पणजी : दोन वर्षांपूर्वी बार्देश तालुक्यातील शिरसई येथे एक धक्कादायक घटना घडली होती. एका आईने वैतागून रागाच्या भरात आपल्या पाच महिन्यांच्या मुलीवर लाटण्याच्या सहाय्याने वार करत तीची हत्या केली होती. दरम्यान या प्रकरणी बाल न्यायालयाने आई आर्मिंदा डोरा फर्नांडिस हिला जन्मठेप आणि १.१० लाख रुपये दंडाची शिक्षा ठोठावली आहे. याबाबतचा आदेश बाल न्यायालयाचे अध्यक्ष सई प्रभुदेसाई यांनी दिला आहे.
नेमके प्रकरण काय ?
कोलवाळ पोलिसांनी १४ ऑगस्ट २०२२ रोजी या प्रकरणी गुन्हा दाखल केला होता. त्यानुसार, कपेलवाडा सिरसई येथील पाच महिन्याच्या चिमुकलीचे वडील सुदन गोंडलेकर यांनी १४ ऑगस्ट २०२२ रोजी उत्तररात्री ३.३० वाजण्याच्या सुमारास चिमुकलीला रक्ताच्या थारोळ्यात बास्केटमध्ये घालून कोलवाळ पोलीस स्थानक गाठले होते. पोलिसांनी त्वरित चिमुकलीला म्हापशातील जिल्हा इस्पितळात दाखल केले असता डॉक्टरांनी तिचा आधीच मृत्यू झाल्याचे जाहीर केले. त्यानंतर हा खुनाचा प्रकार उघडकीस आला होता. या प्रकरणी तत्कालीन पोलीस उपनिरीक्षक मंदार परब यांनी तक्रार दाखल केली होती.
त्यानुसार, तत्कालीन पोलीस निरीक्षक सोमनाथ माजिक यांनी चिमुकलीच्या खून प्रकरणी आई वडिलांना ताब्यात घेतले. त्यानंतर पोलिसांनी आई आर्मिंदा डोरा फर्नांडिस आणि वडील सुदन गोंडलेकर या दोघांविरोधात भारतीय दंड संहितेच्या ३०२ व गोवा बाल कायदा कलम ८ नुसार गुन्हा नोंद केला. त्यानंतर पोलिसांनी त्या दोघांची चौकशी केली असता, त्यांनी आपल्या जबाबात वारंवार बदल करण्याचा प्रयत्न केला होता. पोलिसांनी कसून चौकशी केली असता, आई आर्मिंदा डोरा फर्नांडिस हिने रागाच्या भरात मुलीला हातातील लाटण्याने मारहाण केली होती. त्यातच तिचा मृत्यू झाल्याचे उघड झाले. ही घटना समोर आल्यानंतर पोलिसांनी वडिलांना सोडले आणि आईला अटक केली होती.
या प्रकरणी तपास पूर्ण झाल्यानंतर पोलिसांनी आईच्या विरोधात ३० साक्षीदारांची साक्ष नोंदवून २०० पानी आरोपपत्र म्हापसा येथील प्रथमवर्ग न्यायालयात दाखल केले. हे प्रकरण बाल न्यायालयाच्या अधिकार क्षेत्रात येत असल्यामुळे तिथे वर्ग करण्यात आले. न्यायालयात सरकारी वकील मिलैना पिंटो आणि थेमा नार्वेकर या दोघांनी बाजू मांडून पुरावे सादर केले. त्यानंतर बाल न्यायालयाने चिमुकलीची आई आर्मिंदा डोरा फर्नांडिस हिला दोषी ठरविले.
या प्रकरणी बाल न्यायालयाने आई आर्मिंदा डोरा फर्नांडिस हिला भादंसंच्या कलम ३०२ (खून) अंतर्गत जन्मठेप आणि १० हजार रुपये दंड. दंड न भरल्यास एक वर्षाची साधी कैद. तर गोवा बाल कायद्याचे कलम ८ अंतर्गत तीन वर्षांचा सश्रम कारावास आणि १ लाख रुपये दंड. दंड न भरल्यास दोन वर्षांची साधी कैद, अशी शिक्षा ठोठावली आहे.
