पणजी : गोव्यात हिंदू, मुस्लिम आणि ख्रिस्ती अशा सर्व धर्मीयांमध्ये अत्यंत दृढ धार्मिक सलोखा व सर्वधर्मसमभाव आहे. गोवा राज्य हे देशभरात आपल्या पारंपरिक बंधुभाव आणि एकोप्यासाठी ओळखले जाते. असे असताना राज्य सरकारने आणू घातलेले बेकायदा धर्मांतरणविरोधी विधेयक हे राज्यातील धार्मिक सलोख्यासाठी अत्यंत हानीकारक ठरणारे आहे. या विधेयकामुळे विविध धर्मीयांमध्ये अनावश्यक तेढ व गैरसमज निर्माण होण्याची गंभीर भीती असल्याने, मुख्यमंत्र्यांनी हे विधेयक विधानसभेत मांडू नये, असे आग्रही आवाहन दक्षिण गोव्याचे खासदार कॅप्टन विरियातो फर्नांडिस यांनी केले आहे.
गोव्यात सध्या बेकायदा धर्मांतरणाचे प्रकार मोठ्या प्रमाणावर घडत आहेत का, याबाबत सरकारकडे कोणतेही पुरावे किंवा ठोस माहिती उपलब्ध नाही. अशी कोणतीही अधिकृत आकडेवारी नसताना किंवा गरज सिद्ध झालेली नसताना अशा प्रकारचे संवेदनशील विधेयक घाईघाईने आणणे पूर्णपणे अयोग्य असल्याचे खासदार फर्नांडिस यांनी स्पष्ट केले. गोव्यातील सामाजिक विण अत्यंत निसर्गरम्य आणि गुण्यागोविंदाने राहणारी आहे. येथे चतुर्थीच्या वेळी ख्रिस्ती बांधव हिंदूंच्या घरी जातात, नाताळच्या सणाला हिंदू बांधव ख्रिस्ती बांधवांच्या घरी जाऊन शुभेच्छा देतात, तर ईद आणि मोहरमच्या वेळी हिंदू व ख्रिस्ती बांधव मुस्लिमांच्या घरी उत्साहाने एकत्र येतात, ही गोव्याची ओळख आहे.
जेव्हा राज्यात असा अद्वितीय धार्मिक सलोखा आधीपासूनच अस्तित्वात आहे, तेव्हा बेकायदा धर्मांतरणविरोधी कायदा आणण्याची नेमकी काय गरज भासली, असा थेट सवाल त्यांनी उपस्थित केला. राज्य सरकारने कोणत्याही एकांगी निर्णयाऐवजी राज्यातील सर्व घटकांच्या आणि धर्मीयांच्या भावनांचा आदर केला पाहिजे. गोव्यातील शांतता, ऐक्य आणि बंधुभाव अबाधित ठेवण्यासाठी मुख्यमंत्र्यांनी हे विधेयक विधानसभेत मांडण्याचा विचार तात्काळ सोडून द्यावा, अशी ठाम मागणी खासदार कॅप्टन विरियातो फर्नांडिस यांनी केली आहे.