पणजी : गोव्याचे माजी रणजी क्रिकेटपटू आणि प्रसिद्ध उद्योजक जयेश रवींद्र शेट्टी (५६) यांचे निधन झाले आहे. त्यांच्या निधनाने गोव्याच्या क्रीडा आणि उद्योग जगतात मोठी हळहळ व्यक्त केली जात आहे.
१० एप्रिल १९७० रोजी म्हैसूर (मंगळुरू) येथे जन्मलेले जयेश शेट्टी हे उजव्या हाताचे मध्यमगती गोलंदाज आणि फलंदाज होते. त्यांनी प्रथम श्रेणी क्रिकेटमध्ये गोव्याच्या रणजी संघाचे यशस्वी प्रतिनिधित्व केले होते.
जयेश शेट्टी यांच्या क्रिकेट कारकिर्दीतील सर्वात उल्लेखनीय बाब म्हणजे त्यांचा पदार्पणाचा सामना. रणजी स्पर्धेत केरळविरुद्ध खेळताना त्यांनी आपल्या पहिल्याच षटकात तब्बल ४ फलंदाजांना बाद (४ विकेट्स) करण्याची अत्यंत दुर्मिळ आणि ऐतिहासिक कामगिरी केली होती. त्यांच्या या सनसनाटी गोलंदाजीने क्रीडा क्षेत्रात सर्वांचे लक्ष वेधून घेतले होते.
त्यांनी १० प्रथम श्रेणी सामन्यांत १२ बळी घेतले होते. ४४ धावांत ६ बळी ही त्यांची सर्वोत्तम गोलंदाजी ठरली. यात त्यांनी एकदा डावात ५ बळी घेण्याचा पराक्रम केला. त्यांनी प्रथम श्रेणी सामन्यांत एकूण १५८ धावा केल्या होत्या. ३४ धावा ही त्यांची सर्वोच्च वैयक्तिक धावसंख्या होती.
निवृत्तीनंतर उद्योजक म्हणून यशस्वी
क्रीडा क्षेत्रातील निवृत्तीनंतर त्यांनी उद्योजक म्हणूनही यश संपादन केले होते. एक प्रभावी मध्यमगती गोलंदाज आणि मनमिळावू व्यक्तिमत्त्व म्हणून गोव्यातील क्रिकेट वर्तुळात ते नेहमी स्मरणात राहतील. गोव्यातील अनेक क्रिकेटपटू, क्रीडाप्रेमी आणि उद्योजकांनी त्यांच्या निधनाबद्दल तीव्र दुःख व्यक्त केले आहे.