महानगरपालिकेच्या माजी आयुक्तांकडून परवानगी
गुवाहाटी : आसामची राजधानी गुवाहाटी येथे सार्वजनिक शौचालयाच्या आवारात सुरू असलेल्या खाद्यपदार्थांच्या स्टॉलमुळे मोठा वाद निर्माण झाला आहे. (Assam: Food Stall Inside Public Toilet Triggers Outrage) आर्यनगर परिसरातील डॉ. भुबनेश्वर बोरुआ कर्करोग संस्थेजवळील सार्वजनिक शौचालय संकुलात अन्न तयार करून विकले जात असल्याचा आरोप स्थानिक नागरिकांनी केला. स्वच्छता व अन्नसुरक्षेच्या निकषांबाबत गंभीर प्रश्न उपस्थित केले आहेत.
स्थानिक रहिवासी आणि प्रवाशांनी या प्रकाराबद्दल तीव्र नाराजी व्यक्त केली आहे. स्वच्छतेसाठी उभारलेल्या सार्वजनिक शौचालयाच्या परिसरात खाद्यपदार्थांची विक्री होत असल्याने ग्राहकांच्या आरोग्याला धोका निर्माण होऊ शकतो, अशी भीती नागरिकांनी व्यक्त केली आहे.
“सार्वजनिक शौचालयाच्या संकुलात अन्न तयार करून विक्री कशी केली जाऊ शकते? याला परवानगी कोणी दिली?” असे प्रश्न स्थानिकांनी उपस्थित केले आहेत. काही नागरिकांनी स्टॉल चालकांकडे चौकशी केली असता त्यांनी आवश्यक परवानग्या घेतल्याचा दावा केल्याचे सांगितले.
माजी आयुक्तांनी दिली परवानगी
या प्रकरणावर प्रतिक्रिया देताना गुवाहाटी महानगरपालिकेच्या (GMC) अधिकाऱ्यांनी संबंधित सार्वजनिक शौचालयाचे व्यवस्थापन लायन्स क्लब ऑफ गुवाहाटीकडे असल्याचे सांगितले. खाद्यपदार्थांच्या स्टॉलसाठी परवानगी महानगरपालिकेच्या माजी आयुक्तांनी दिली होती, अशी माहितीही त्यांनी दिली.
कर्करोग संस्थेत उपचारासाठी येणाऱ्यांसाठी स्टॉल
दरम्यान, लायन्स क्लबने या व्यवस्थेचे समर्थन केले आहे. कर्करोग संस्थेत उपचारासाठी येणाऱ्या रुग्णांच्या नातेवाईकांना व भेट देणाऱ्यांना अल्पोपहाराची सुविधा उपलब्ध करून देण्यासाठी हा स्टॉल सुरू करण्यात आल्याचे क्लबकडून सांगण्यात आले. शौचालय संकुलाची नियमित स्वच्छता केली जाते आणि स्वच्छतेच्या सर्व नियमांचे पालन केले जात असल्याचा दावा करण्यात आला.
अन्नसुरक्षा, स्वच्छतेबाबतीत प्रश्नचिन्ह
तथापि, सार्वजनिक शौचालयाच्या परिसरात खाद्यपदार्थांची विक्री करण्याच्या निर्णयामुळे अन्नसुरक्षा, स्वच्छता आणि कायदेशीर वैधतेबाबत प्रश्नचिन्ह निर्माण झाले आहे. या प्रकरणाची सखोल चौकशी करून सार्वजनिक आरोग्याशी कोणतीही तडजोड होणार नाही याची खात्री करावी, अशी मागणी नागरिकांकडून करण्यात येत आहे.
