पर्यटकाच्या खून प्रकरणात ‘हनी ट्रॅप’मधील महिला; शोध जारी

म्हापसा :गुजराती व्यावसायिकाला हनी ट्रॅपमध्ये अडकवून लुटल्याचा गुन्हा नोंद असलेली संशयित महिलाच आता उडुपीतील उद्योजक संदीप सुवर्णा यांच्या गूढ मृत्यू प्रकरणातही मुख्य आरोपी ठरली आहे. श्रीमंतांना कॅसिनोमध्ये जाळ्यात ओढून लुबाडण्याच्या या महिलेच्या गुन्हेगारी कारवायांमुळे पोलिसही चक्रावले असून, तिचा कसून शोध सुरू आहे.

सुवर्णा यांच्या खूनप्रकरणी महिलेवर गुन्हा

उडुपी (कर्नाटक) येथील वॉटर स्पोर्टस् बोट व्यावसायिक संदीप सुवर्णा (४२, रा. मालपे, उडुपी) यांच्या खून प्रकरणी अक्षता उर्फ रूपाश्री सी. या संशयित महिलेवर गुन्हा दाखल करण्यात आला आहे. ही महिला सध्या फरार असून, श्रीमंत व्यक्तींना कॅसिनोमध्ये जाळ्यात ओढून त्यांना हॉटेलमध्ये नेऊन लुटण्याचा तिचा कट असल्याचे तपासात पुढे आले आहे.

कॅसिनोमध्ये आलेल्या श्रीमंत व्यक्तींना आपल्या जाळ्यात ओढून हॉटेलमध्ये नेणे, त्यांना बेशुद्ध करून लुबाडणे आणि हनी ट्रॅपमध्ये अडकवून ब्लॅकमेल करणे, अशी या संशयित महिलेची गुन्हेगारी कार्यपद्धत आहे. यापूर्वी गुजरातमधील व्यावसायिक तोमेश यादव यांना अशाच प्रकारे हॉटेलमध्ये बेशुद्ध करून या महिलेने २.४० लाख रुपयांचे दागिने लुटले होते. मात्र, या गुंगीच्या औषधाच्या प्रकारातून यादव बचावले होते. दरम्यान, पणजी पोलिसांतही या संशयित महिलेविरुद्ध चोरीचा आणखी एक गुन्हा नोंद आहे.

मृत्यूचे कारण अद्याप अस्पष्ट

शवविच्छेदन अहवालात मृत्यूचे नेमके कारण स्पष्ट झालेले नाही. मात्र, मृताच्या गळ्यातील सोनसाखळी आणि पाकीट गायब असल्याने ही चोरी त्याच संशयित महिलेने केल्याचा संशय मृताच्या नातेवाईकांनी व्यक्त केला आहे. घटनेच्या दिवशीच ती गोव्यातून कर्नाटकमध्ये पसार झाली असून, तिला अटक करण्यासाठी कळंगुट पोलिसांचे पथक मंगळूरू आणि बंगळूरू येथे रवाना झाले आहे. स्थानिक पोलिसांच्या मदतीने तिचा शोध सुरू आहे.

रविवार, २८ तारखेला संदीप सुवर्णा हे भाऊ आणि मित्रांसह उडुपीहून गोव्यात पर्यटनासाठी आले होते. सोमवारी रात्री ते पणजीतील कॅसिनोमध्ये गेले असता त्यांची संशयित महिलेशी ओळख झाली. मंगळवारी सकाळी दोघे कळंगुटमधील फाल्कन रिसॉर्टमध्ये गेले, तर संदीप यांचे भाऊ आणि मित्र दुसऱ्या हॉटेलमध्ये परतले.