२०२६ च्या पहिल्या पाच महिन्यांत आकडा जवळपास २० लाखांवर
पणजी : गोव्याच्या पर्यटन क्षेत्रात लक्षणीय वाढ नोंदविण्यात आली आहे. गेल्या वर्षीच्या याच कालावधीच्या तुलनेत २०२६ च्या पहिल्या पाच महिन्यांत रेल्वेने गोव्यात येणाऱ्या पर्यटकांच्या संख्येत ६.८ टक्क्यांनी वाढ झाली असल्याची माहिती पर्यटन खात्याने दिली आहे.
पर्यटन खात्याने जारी केलेल्या आकडेवारीनुसार, जानेवारी ते मे २०२६ या कालावधीत एकूण १९ लाख ८७ हजार ८६२ प्रवासी रेल्वेने गोव्यात दाखल झाले. २०२५ मधील याच कालावधीत आलेल्या १८ लाख ६० हजार ५६८ प्रवाशांच्या तुलनेत हा आकडा अधिक आहे. तसेच, २०२४ च्या याच कालावधीच्या तुलनेतही या आकड्यात ६.५ टक्क्यांची वाढ नोंदविण्यात आली आहे. या आकडेवारीवरून गोव्याच्या पर्यटन क्षेत्रात वर्षानुवर्षे वाढ होत असल्याचे दिसून येते.
जानेवारी महिन्यात ४.२५ लाख प्रवासी गोव्यात आले. मात्र, फेब्रुवारीत हा आकडा ३.४३ लाखांवर घसरला आणि मार्चमध्ये आणखी कमी होऊन ३.२० लाख इतके प्रवासी आले. एप्रिल महिन्यात प्रवाशांच्या संख्येत वाढ होऊन ती ३.६६ लाखांवर पोहोचली, तर मे महिन्यात हा आकडा पुन्हा वाढून ४.०४ लाखांपर्यंत गेला.
रेल्वे जोडणीतील सुधारणा झाल्यामुळे पर्यटनाला चालना मिळाली असून पर्यटकांचा प्रवास अधिक सोयीस्कर झाला असल्याचे पर्यटन अधिकाऱ्यांनी सांगितले. पुढेही पायाभूत सुविधा सुधारून अधिक सक्षम पर्यटन व्यवस्था उभारण्यावर गोवा सरकार भर देत असून, त्याचा लाभ पर्यटक, स्थानिक नागरिक आणि राज्याच्या अर्थव्यवस्थेला दीर्घकालीन स्वरूपात होणार असल्याचे त्यांनी नमूद केले.
रेल्वे मार्गातील सुधारणा आणि पर्यटनाच्या विविध प्रकारांच्या विकासामुळे ही वाढ झाली आहे. रेल्वेने येणाऱ्या प्रवाशांच्या संख्येतील सातत्यपूर्ण वाढ ही गोवा हे वर्षभर पर्यटनासाठी पसंतीचे ठिकाण असल्याचा पर्यटकांचा विश्वास दर्शवते. रेल्वे जोडणीतील वाढ, समुद्रकिनाऱ्यांव्यतिरिक्त इतर पर्यटनस्थळांचा विस्तार आणि दर्जेदार पर्यटनावर असलेला आमचा भर यामुळे पर्यटक पुन्हा-पुन्हा गोव्याला भेट देण्यास प्राधान्य देत आहेत, असे पर्यटनमंत्री रोहन खंवटे यांनी सांगितले.
