जुन्या फेरीबोटी आता बनणार तरंगते रेस्टॉरंट

पणजी :गोव्यातील जुन्या फेरीबोटींना नवसंजीवनी देण्याचा निर्णय पर्यटन खात्याने घेतला असून त्यांचे रूपांतर आता तरंगत्या रेस्टॉरंट आणि ‘डिजिटल नोमॅड’ पर्यटकांसाठी कामकाजाच्या सुविधायुक्त केंद्रांमध्ये करण्यात येणार आहे. हा प्रकल्प सार्वजनिक-खासगी भागीदारी (पीपीपी) तत्त्वावर राबवण्यात येणार असून, यासाठी पर्यटन खात्याने निविदाही जारी केल्या आहेत.

डिजिटल नोमॅड्ससाठी विशेष संकल्पना

डिजिटल नोमॅड हा असा पर्यटक असतो, जो प्रवास करतानाही तंत्रज्ञान आणि इंटरनेटच्या साहाय्याने आपले काम सुरू ठेवतो. कोणत्याही विशिष्ट ठिकाणी स्थायिक न राहता विविध देशांमध्ये किंवा शहरांमध्ये राहून काम करणाऱ्या या नव्या पिढीच्या पर्यटकांची संख्या जगभरात वाढत आहे. त्यांच्या गरजा लक्षात घेऊन जुन्या फेरीबोटींचे रूपांतर आधुनिक सुविधांनी सुसज्ज अशा तरंगत्या केंद्रांमध्ये करण्यात येणार आहे.

दोन फेरीबोटींचा प्रकल्पात समावेश

या प्रकल्पासाठी पर्यटन खात्याच्या ताब्यातील ‘एम.व्ही. मुरगाव’ आणि ‘एम.व्ही. चांदोर’ या दोन फेरीबोटी उपलब्ध करून दिल्या जाणार आहेत. या दोन्ही बोटी मांडवी नदीत कायमस्वरूपी नांगरून ठेवण्यात येतील आणि त्यांचा वापर पायाभूत सुविधांप्रमाणे केला जाणार आहे.

१५ वर्षांचा करार, वाढीचीही तरतूद

प्रकल्पासाठी निवडण्यात येणाऱ्या खासगी भागीदारासोबत सुरुवातीला १५ वर्षांचा करार करण्यात येणार आहे. प्रकल्प यशस्वी ठरल्यास हा करार पुढील १५ वर्षांसाठी वाढवण्याची तरतूदही करण्यात आली आहे. त्यामुळे हा उपक्रम दीर्घकालीन पर्यटन आणि व्यवसाय केंद्र म्हणून विकसित करण्याचा सरकारचा मानस स्पष्ट होत आहे.

एआय स्टार्टअप्सनाही प्राधान्य

पर्यटक, डिजिटल नोमॅड्स तसेच कृत्रिम बुद्धिमत्ता (एआय) आणि अन्य नव्या तंत्रज्ञान क्षेत्रात कार्यरत भारतीय स्टार्टअप्स व तंत्रज्ञान व्यावसायिकांच्या गरजा लक्षात घेऊन हा प्रकल्प विकसित करण्याची अट निविदेत घालण्यात आली आहे. त्यामुळे गोव्याला केवळ पर्यटन नव्हे, तर नवउद्योजकता आणि तंत्रज्ञान क्षेत्रातील केंद्र म्हणूनही ओळख मिळण्याची अपेक्षा व्यक्त केली जात आहे.