पणजी :गोवा सरकारच्या गट ‘क’मधील एलडीसी, यूडीसी, स्टेनोग्राफर, पंचायत सचिव, अव्वल कारकून, ग्रामसेवक आणि कनिष्ठ अभियंता यांसारख्या एकूण ११५ प्रकारच्या पदांसाठी आता सहा महिन्यांचा संगणक अभ्यासक्रम पूर्ण करणे सक्तीचे करण्यात आले आहे. या नव्या नियमाची अंमलबजावणी १ जानेवारी २०२७ पासून केली जाणार आहे.
भरती नियमांमध्ये महत्त्वाचा बदल
गट ‘क’ कर्मचाऱ्यांच्या भरती नियमांमध्ये बदल करणारी अधिसूचना शासनाने जारी केली आहे. ज्या पदांसाठी संगणक अभ्यासक्रम आवश्यक आहे, त्यांची सविस्तर यादी अधिसूचनेत नमूद करण्यात आली आहे. यात ड्राफ्ट्समन, हेल्पर, साहाय्यक ग्रंथपाल, टायपिस्ट आणि थिएटर व्यवस्थापक या पदांचाही समावेश करण्यात आला आहे.
मान्यताप्राप्त संस्थेचा अभ्यासक्रम आवश्यक
हा अभ्यासक्रम गोवा सरकारच्या इन्फोटेक महामंडळाची किंवा भारत सरकारमान्य संस्थेची मान्यता असलेल्या केंद्रातूनच पूर्ण करणे आवश्यक राहणार आहे. संगणक ज्ञान आणि डिजिटल कौशल्यांना प्राधान्य देण्यासाठी हा निर्णय घेण्यात आल्याचे मानले जात आहे.
कॉम्प्युटर सायन्स, कॉम्प्युटर अॅप्लिकेशन्स, माहिती तंत्रज्ञान (आयटी), इलेक्ट्रॉनिक्स किंवा इलेक्ट्रिकल अँड इलेक्ट्रॉनिक्स या विषयांतील डिप्लोमा अथवा पदवीधारकांना स्वतंत्र सहा महिन्यांचा संगणक अभ्यासक्रम करण्याची आवश्यकता राहणार नाही. तसेच आयटीआयमधील कॉम्प्युटर प्रोग्रामर अभ्यासक्रम पूर्ण केलेल्या उमेदवारांनाही या अटीतून सूट देण्यात आली आहे.
संगणक ज्ञान चाचणी मात्र अनिवार्य
काही उमेदवारांना अभ्यासक्रमातून सूट देण्यात आली असली, तरी गट ‘क’ पदांसाठी अर्ज करणाऱ्या सर्व उमेदवारांना संगणक ज्ञानाची चाचणी देणे अनिवार्य राहणार आहे. त्यामुळे शासकीय सेवेत प्रवेश घेऊ इच्छिणाऱ्या उमेदवारांसाठी मूलभूत संगणक कौशल्य आवश्यक ठरणार आहे.
- गट ‘क’मधील ११५ प्रकारच्या पदांसाठी सहा महिन्यांचा संगणक अभ्यासक्रम सक्तीचा.
- नवीन नियम १ जानेवारी २०२७ पासून लागू होणार.
- एलडीसी, यूडीसी, स्टेनोग्राफर, पंचायत सचिव, ग्रामसेवक, कनिष्ठ अभियंता यांसह अनेक पदांचा समावेश.
- अभ्यासक्रम मान्यताप्राप्त संस्था किंवा गोवा इन्फोटेक महामंडळाशी संलग्न केंद्रातूनच पूर्ण करावा लागणार.
- आयटी, कॉम्प्युटर सायन्स आणि संबंधित शाखांतील पदवी-डिप्लोमा धारकांना सूट.
- सर्व उमेदवारांसाठी संगणक ज्ञान चाचणी अनिवार्य.