कोटा: राजस्थानमधील कोटा शहरात शनिवारी रात्री उशिरा एक अत्यंत भीषण आणि काळजाचा थरकाप उडवणारी घटना घडली. शहरातील जवाहर नगर पोलीस स्टेशनच्या हद्दीतील इंदिरा विहार परिसरात एक तीन मजली इमारत अचानक कोसळली. इमारतीच्या ढिगाऱ्याखाली दबल्यामुळे दोघांचा जागीच मृत्यू झाला असून अनेक जण जखमी झाले आहेत.
रात्रीच्या वेळी कोसळली इमारत
मिळालेल्या माहितीनुसार, शनिवारी रात्री जेव्हा सर्वजण गाढ झोपेत होते, तेव्हा अचानक मोठ्या आवाजासह ही तीन मजली इमारत कोसळली. आवाजामुळे परिसरातील लोक जागे झाले आणि घटनास्थळी नागरिकांची मोठी गर्दी झाली. या घटनेची माहिती मिळताच स्थानिक पोलीस, अग्निशमन दल, एनडीआरएफ (NDRF) आणि एसडीआरएफ (SDRF) च्या तुकड्यांनी तात्काळ घटनास्थळी धाव घेऊन बचावकार्य सुरू केले. ढिगाऱ्याखाली आणखी लोक अडकले असण्याची शक्यता असल्याने रात्रभर आणि दुसऱ्या दिवशीही युद्धपातळीवर शोधमोहीम राबवण्यात आली.
प्रशासकीय आणि राजकीय नेत्यांची भेट कोटा विभागाचे आयुक्त अनिल कुमार अग्रवाल यांनी दिलेल्या माहितीनुसार, या दुर्घटनेत आतापर्यंत दोन जणांच्या मृत्यूची पुष्टी झाली आहे. एकूण १५ जणांना ढिगाऱ्याखालून बाहेर काढण्यात आले, त्यापैकी १३ जण जखमी झाले होते. सुरुवातीच्या तपासानुसार, इमारतीच्या वरच्या बाजूला काही नवीन बांधकामाचे काम सुरू होते आणि निकृष्ट दर्जाच्या कामामुळे ही दुर्घटना घडली असावी, असा प्राथमिक अंदाज आहे. तसेच, बाजूलाच ड्रिलिंगचे काम सुरू असल्याचेही स्थानिक नागरिकांनी सांगितले आहे.
राजस्थानचे ऊर्जा मंत्री हिरालाल नागर यांनी या दुर्घटनेबद्दल तीव्र दुःख व्यक्त केले आहे. त्यांनी सांगितले की, जखमींपैकी बहुतेकांना प्राथमिक उपचारानंतर घरी सोडण्यात आले असून पाच जण अद्याप रुग्णालयात उपचार घेत आहेत. राज्य सरकार या प्रकरणाची सखोल चौकशी करण्यासाठी एक समिती स्थापन करणार असून, चौकशी अहवालात दोषी आढळणाऱ्यांवर कठोर कारवाई केली जाईल, असे आश्वासन त्यांनी दिले आहे.
तपासासाठी तांत्रिक समितीची स्थापना जिल्हाधिकारी पीयूष समारिया यांनी सांगितले की, कोसळलेल्या इमारतीच्या खालच्या मजल्यावर एक कॅफे सुरू होता. बाजूची जुनी इमारत पाडताना या इमारतीचा पाया कमकुवत झाला असावा, अशीही शक्यता वर्तवली जात आहे. मात्र, ठोस निष्कर्षापर्यंत पोहोचण्यासाठी तांत्रिक तपासाची गरज असून त्यानंतरच दुर्घटनेचे नेमके कारण स्पष्ट होईल. सद्यस्थितीत बचाव कार्य पूर्ण झाले असून ढिगारा हटवण्याचे काम सुरू आहे.
