वजनातील तफावतमुळे गांजा प्रकरणातील संशयित मुक्त

पणजी : अमली पदार्थ विरोधी कायद्यानुसार जप्त केलेली वस्तू ही ‘गांजा’च्या कायदेशीर व्याख्येत बसत नाही, तसेच जप्त केलेल्या वस्तूच्या वजनामध्ये मोठी विसंगती आहे, असे निरीक्षण न्यायालयाने नोंदवले आहे. या आधारावर मेरशी येथील अतिरिक्त सत्र न्यायालयाच्या न्यायाधीश आरतीकुमारी नाईक यांनी संशयित अविजीत जाना (२०, रा. पश्चिम बंगाल) याची पुराव्याअभावी निर्दोष सुटका केली आहे.

गोवा पोलिसांच्या गुन्हा शाखेने १९ ऑगस्ट २०२१ रोजी हडफडे येथे ही कारवाई केली होती. हॉटेल मरीना डुराडो जवळ संशयास्पदरित्या फिरणाऱ्या अविजीत जाना याला ताब्यात घेण्यात आले होते. त्याच्या झडतीत ५ लाख रुपये किमतीचा ५ किलो गांजा सापडल्याचा दावा पोलिसांनी केला होता. मात्र, तांत्रिक मुद्द्यांवर हा खटला कमकुवत ठरला.

खटल्याचा घटनाक्रम

बचाव पक्षाचा प्रभावी युक्तिवाद

संशयितांतर्फे अॅड. मायकल फर्नांडिस यांनी बाजू मांडली. सुनावणी दरम्यान त्यांनी दोन मुख्य मुद्दे न्यायालयासमोर ठेवले:

• व्याख्येतील त्रुटी: पोलिसांनी जप्त केलेली आणि प्रयोगशाळेत पाठविलेली वस्तू एनडीपीएस कायद्यानुसार ‘गांजा’च्या अधिकृत व्याख्येत बसत नाही.
• वजनातील तफावत: जप्तीच्या वेळी पोलिसांनी नोंदवलेले वजन आणि न्यायवैद्यक प्रयोगशाळेत (FSL) मोजलेले वजन यामध्ये मोठी विसंगती आढळून आली.

न्यायालयाचे निरीक्षण आणि निकाल

दोन्ही बाजूंचे म्हणणे ऐकून घेतल्यानंतर न्यायालयाने बचाव पक्षाचा युक्तिवाद ग्राह्य धरला. जप्त माल आणि वजन यांतील तांत्रिक त्रुटी तसेच ठोस पुराव्यांचा अभाव यामुळे संशयिताची निर्दोष मुक्तता करण्याचा आदेश न्यायाधीश आरतीकुमारी नाईक यांनी दिला.