वेश्या व्यवसायातील २१.२ कोटींचे उलाढाल प्रकरण
पणजी : वेश्या व्यवसायातील २१.२ कोटींच्या उलाढाल प्रकरणातील संशयित न्यूटन मुथुरी किमानी या केनियन नागरिकाला मायदेशी पळ काढण्याचा प्रयत्नात असताना दिल्ली विमानतळावर सक्तवसुली संचालनालयाने (ईडी) डिसेंबर २०२३ मध्ये अटक केली होती. २४ तासांहून जास्त काळ तो ईडीच्या ताब्यात होता. त्याला न्यायालयासमोर हजर करण्यास उशीर केल्याचे निरीक्षण नोंदवून गोवास्थित मुंबई उच्च न्यायालयाने २ लाख रुपये व इतर अटींवर सशर्त जामीन मंजूर केला. याबाबतचा आदेश न्या. वाल्मिकी मिनिझीस यांनी दिला. हणजूण पोलिसांनी एका केनियन महिलेच्या तक्रारीची दखल घेऊन ८ सप्टेंबर २०२३ रोजी गुन्हा दाखल करून संशयित मारिया डोर्कास उर्फ इस्त्रालीट आणि विल्किस्टा आचिस्टा या केनियन महिला दलालांना अटक केली होती. पोलिसांनी त्यावेळी सात केनियन महिलांची सुटका केली होती.
या प्रकरणात हवाला आणि मनी लाँड्रिंगचा संशय असल्याचे गृहीत धरून ईडीने चौकशी सुरू केली होती. त्यानुसार, ईडीने ८ डिसेंबर २०२३ रोजी मायदेशी पळणाऱ्या न्यूटन मुथुरी किमानी याला दिल्ली विमानतळावरून ताब्यात घेतले. त्यानंतर ९ डिसेंबर २०२३ रोजी गोव्यात आणल्यानंतर सायंकाळी ६.३० वाजता त्याला अटक केली. मारिया डोर्कास उर्फ इस्त्रालीट आणि विल्किस्टा आचिस्टा यांनी वेश्या व्यवसायातून येणारे पैसे हाताळण्याची जबाबदारी त्याला दिली होती. संशयित न्यूटन विद्यार्थी असून त्याने हेलन जेम्स किमारो याच्या मदतीने पंजाब आणि बंगळुरू येथे विविध बँकेत ११ खाती उघडली होती. त्या खात्यात ते १३ केनियन युवतींकडून देहविक्रीतून कमवलेले पैसे बँक खात्यात क्युआर कोडद्वारे जमा करत होते. त्यानंतर न्यूटन बँक खात्यातील रक्कम संबंधित युवतीच्या सूचनेनुसार, त्याच्या केनियातील बँक खात्यात किंवा एमपैसा अॅपमध्ये जमा करत होता. या व्यवहारातून सुमारे २१.२ कोटी रुपयांची उलाढाल झाली. यातील ३.४ कोटी रुपये न्यूटनने चार हवाला एजंट मार्फत केनियात पाठविले होते. ईडीने याबाबत तपास पूर्ण करून मारिया डोर्कास उर्फ इस्त्रालीट, विल्किस्टा आचिस्टा, न्यूटन मुथुरी किमानी आणि फरार हेलन जेम्स किमारो याच्या विरोधात पणजी येथील विशेष न्यायालयात आरोपपत्र दाखल केले. त्यानंतर न्यूटन याने न्यायालयात जामीन अर्ज दाखल केला. हा अर्ज म्हापसा येथील अतिरिक्त सत्र न्यायमूर्ती शर्मिला पाटील यांनी फेटाळून लावला. या आदेशाला न्युटन याने उच्च न्यायालयात आव्हान दिले.
२४ तासांहून जास्त काळ ताब्यात ठेवल्याचा युक्तिवाद
न्यायालयात सुनावणी झाली असता, न्यूटन याला ८ डिसेंबर २०२३ रोजी सकाळी १०.३० वा. ताब्यात घेतला होता. त्यानंतर त्याला ९ डिसेंबर २०२३ रोजी सायंकाळी ६.३० वा. अटक केल्याचे दाखवून सायंकाळी ७.३० वा. न्यायदंडाधिकाऱ्यांसमोर हजर करण्यात आले. त्याला २४ तासांहून जास्त काळ ताब्यात ठेवण्यात आल्याचा युक्तिवाद मांडला. याची दखल घेऊन न्यायालयाने २ लाख रुपये व इतर अटींवर सशर्त जामीन मंजूर केला.
