टँकर-‘रेंट अ कॅब’च्या अपघातात दोघांचा झाला हाेता मृत्यू
पणजी : मडगाव ते पणजी राष्ट्रीय महामार्गावरील बांबोळी येथे नियाझ रेस्टॉरंटजवळील उतरणीवर सोमवारी मध्यरात्री टँकर आणि ‘रेंट अ कॅब’च्या भीषण अपघातात सेपक टाक्रॉ असोसिएशनचे अध्यक्ष योगेंद्र सिंग व खेळाडू अंकित कुमार बलियान या दोघांचा मृत्यू झाला होता. या प्रकरणातील टँकरचालक राहुल सरवदे याला मेरशी येथील प्रथमवर्ग न्यायालयाने १४ दिवस न्यायालयीन कोठडी ठोठावली.
सोमवारी मध्यरात्री १२.४५ वा. दरम्यान बांबोळी येथे नियाझ रेस्टॉरंटजवळील उतरणीवर टँकर आणि ‘रेंट अ कॅब’चा भीषण अपघात झाला होता. टँकर बांबोळीहून पणजीच्या दिशेने जात होता, तर ‘रेंट अ कॅब’ पणजीहून मडगावच्या दिशेने जात होती. वरील ठिकाणी उतरणीवर पोहोचताच टँकर चालकाचा वाहनावरील ताबा सुटला. टँकरची धडक प्रथम दुभाजकाला बसली. दुभाजकावरून ओलांडून विरुद्ध बाजूने येत असलेल्या ‘रेंट अ कॅब’ कारला टँकरने धडक दिली. नंतर टँकर रस्त्याच्या बाजूला असलेल्या खड्ड्यात जाऊन उलटला. भरधाव वेगात असलेल्या टँकरची धडक इतकी भीषण होती की, या अपघातात कारचा चक्काचूर झाला होता. अपघातात कारमध्ये असलेले सेपक टाक्रॉ असोसिएशनचे अध्यक्ष योगेंद्र सिंग व खेळाडू अंकित कुमार बलियान या दोघांचा मृत्यू झाला होता. या प्रकरणी जुने गोवा पोलीस स्थानकाचे निरीक्षक सतीश पडवळकर यांच्या मार्गदर्शनाखाली हवालदार चतुर सावंत यांनी घटनास्थळी जाऊन अपघाताचा पंचनामा केला. तर, महिला उपनिरीक्षक जस्वीता नाईक यांनी टँकर चालक राहुल सरवदे याच्यावर गुन्हा नोंद करून त्याला अटक केली होती.
बुधवारी सायंकाळी टँकर चालक सरवदे याला मेरशी येथील प्रथमवर्ग न्यायालयात हजर करण्यात आला. त्यावेळी न्यायालयाने कार चालक सरवदे याला १४ दिवस न्यायालयीन कोठडी ठोठावली.
