पर्यटकांशी सौजन्याने वागा; अतिथी धर्म पाळा

पणजी : गोव्यातील (Goa) हणजुण (Anjuna) येथील एका नाईटक्लबमध्ये (Night Club) बाउन्सर्सनी (Bouncers) पर्यटकांना केलेल्या मारहाणीचे तीव्र पडसाद उमटल्यानंतर पोलिसांनी प्रकरण गंभीरतेने घेतले आहे. किनारपट्टीवरील पोलिसांनी हॉटेल व्यावसायिक, गेस्टहाऊस मालक व संबंधितांची बैठक घेऊन जागृती केली.  पर्यकटकांशी (Tourist)  सौजन्याने वागण्याचे व अतिथी धर्म पाळण्याचे महत्व अधोरेखित केले आहे. 

कळंगुट व हणजुण पोलिसांनी त्यांच्या अखत्यारीतील हॉटेल, गेस्टहाऊस व इतर निवासस्थानांच्या मालकांसोबत बैठक घेतली. एकूण आढावा घेतला व पर्यटकांच्या सुरक्षेच्यादृष्टीने उपाययोजनांना बळकटी दिली. 

कळंगुट पोलीस ठाण्यात झालेल्या बैठकीला पर्वरीचे पोलीस उपअधीक्षक विश्वेश कर्पे, पोलीस निरीक्षक परेश नाईक उपस्थित होते. म्हापसा पोलीस ठाण्यात झालेल्या बैठकीला उपअधीक्षक विल्सन डिसोझा व पोलीस निरीक्षक सूरज गावस उपस्थित होते.  

स्थानिक पर्यटन आणि आतिथ्य क्षेत्रातील सुमारे १५० मालक आणि व्यवस्थापक कळंगुट बैठकीला उपस्थित होते. हणजुण अधिकार क्षेत्रातील बैठकीला सुमारे ७५ जण सहभागी झाले होते.

पोलिस अधिकाऱ्यांनी सर्व सुरक्षा आणि नियामक आवश्यकतांचे काटेकोरपणे पालन करण्याची गरज अधोरेखित केली. विशेषतः पर्यटकांचे रक्षण करण्यासाठी आणि पर्यटन हंगामात सार्वजनिक सुव्यवस्था राखण्यासंदर्भात माहिती देण्यात आली. 

चेक-इन प्रक्रिया पाळावी 

सर्व चेक-इन प्रक्रिया योग्यरित्या पाळल्या जातील, वैध परवाने राखले जातील आणि सीसीटीव्ही प्रणाली नेहमीच कार्यरत राहतील याची खात्री करण्याचे निर्देश आस्थापनांना देण्यात आले.

पुरेसे सुरक्षा कर्मचारी तैनात करण्याचे, गोवा पोलिसांच्या मोबाइल अॅप्लिकेशनचा वापर करून कर्मचाऱ्यांची पार्श्वभूमी पडताळणी करण्याचे आणि त्यांच्या परिसरात ड्रग्ज आणि तंबाखूच्या गैरवापरापासून सावधगिरी बाळगण्याचा सल्ला देण्यात आला.

संगीत वाजवताना ध्वनी मर्यादा पाळा

‍पोलिसांनी संबंधितांना संगीत वाजवताना निर्धारित ध्वनी मर्यादा आणि वेळेचे पालन करण्याची आणि ग्राहकांना आकर्षित करण्यासाठी दलाल किंवा रस्त्यावरील एजंटांचा वापर टाळण्याचे सूचित केले. 

सर्व पर्यटन आणि आतिथ्य संचालकांकडून पूर्ण सहकार्याची अपेक्षा करत, कलंगुट पोलिसांनी आस्थापनांना कोणत्याही सुरक्षा किंवा कायदा आणि सुव्यवस्थेच्या समस्यांची त्वरित तक्रार करावी, अशी सूचना केली. 

संपूर्ण हंगामात पर्यटक आणि स्थानिकांसाठी गोव्याची प्रतिमा सुरक्षित, स्वच्छ आणि स्वागतार्ह ठिकाण म्हणून कायम राहावी हे सुनिश्चित करणे हे उद्दिष्ट असल्याचे पोलीस अधिकारी यांनी सांगितले.