एमपीए अध्यक्ष विनोदकुमार यांची माहिती
प्रतिनिधी। गोवन वार्ता
पणजी : वास्को ते दोना पावला या मार्गावरील रोपवे प्रकल्पासाठीची निविदा या महिन्यात निश्चित केली जाणार आहे. याच आठवड्यात मुरगाव बंदर प्राधिकरण (एमपीए) आणि पर्यटन विभाग यांच्यात होणाऱ्या बैठकीत प्रकल्पाचे वेळापत्रक निश्चित केले जाईल. त्यानंतर संबंधित वर्क ऑर्डर जारी केली जाईल, अशी माहिती एमपीएचे अध्यक्ष एन. विनोदकुमार यांनी दिली.
एमपीए आणि गोवा पर्यटन विभाग संयुक्तपणे सुमारे ४०० कोटी रुपयांचा रोपवे प्रकल्प उभारत आहेत. हा प्रकल्प २०२८ पर्यंत पूर्ण करण्याचे उद्दिष्ट ठेवण्यात आले आहे. सुमारे ४.६ किलोमीटर लांबीचा हा रोपवे झुवारी नदी पार करून दोना पावला आणि मुरगाव बंदर यांना जोडणार आहे. सध्या दोना पावला ते मुरगाव बंदर या मार्गावर रस्त्याने प्रवासाला ४५ मिनिटे लागतात. रोपवे पूर्ण झाल्यानंतर हा प्रवास फक्त १५ मिनिटांत शक्य होणार आहे.
एमपीएचे अध्यक्ष विनोदकुमार म्हणाले की, भारतीय बंदर रेल्वे आणि रोपवे महामंडळ लिमिटेड यांनी सादर केलेला प्रकल्प प्रस्ताव गोवा सरकारकडे मंजुरीसाठी पाठवण्यात आला आहे. या प्रकल्पासाठी वास्को टोकावरील प्रारंभिक स्थानक एमपीएने निश्चित केले असून दोना पावला टोकावरील स्थानक पर्यटन विभागाने निश्चित केले आहे. पर्यटनमंत्री रोहन खंवटे यांनी याबाबत गेल्या आठवड्यात एमपीए अधिकाऱ्यांशी सविस्तर चर्चा केली आहे. आमची दुसरी संयुक्त बैठक नोव्हेंबरच्या पहिल्या आठवड्यात होणार आहे. त्यात प्रकल्पाच्या वेळापत्रकावर अंतिम निर्णय घेतल्यानंतर निविदा प्रक्रिया सुरू करण्यात येईल. त्यानंतर गोवा सरकारकडून भारतीय बंदर रेल्वे आणि रोपवे महामंडळ लिमिटेडला वर्क ऑर्डर दिली जाईल.
