पंचायतीचा आदेश : सीआरझेड नियमांच्या उल्लंघनाचा आरोप
म्हापसा : जनतेच्या वाढत्या दबावामुळे हणजूण पंचायतीने हणजूण येथील समुद्रकिनाऱ्याजवळील एका टेकडीवर कथित बेकायदेशीर बांधकामाविरुद्ध काम थांबवण्याचा आदेश जारी केला आहे. किनारी नियमन क्षेत्र (सीआरझेड) चे उल्लंघन आणि पर्यावरण-संवेदनशील जमिनीचा गैरवापर यावरून वाद निर्माण झाला आहे.
कळंगुटचे आमदार मायकल लोबो यांचा पुत्र आणि पर्राचे सरपंच डॅनियल लोबो यांना लिहिलेल्या पत्रात, हणजूण उपसरपंच स्मिता खोर्जुवेकर यांनी हणजूण गावातील सर्व्हे क्रमांक ४१/३ असलेल्या मालमत्तेवरील चालू काम तत्काळ थांबवण्याचे निर्देश दिले आहेत.
मॅक्सी डिसोझा आणि वागातोर, हणजूण आणि शापोरा येथील अनेक ग्रामस्थांनी दाखल केलेल्या औपचारिक तक्रारीनंतर ही नोटीस देण्यात आली आहे. समुद्राच्या बाजूने बेकायदा भिंत बांधण्याचा आरोप त्यांनी केला आहे. सीआरझेड क्षेत्रात हे बांधकाम केल्याचे त्यांनी म्हटले आहे.
या संदर्भात, सूचना मिळाल्यानंतर बांधकाम तत्काळ थांबवण्याचे निर्देश देण्यात येत आहेत. तसे न केल्यास, कायद्यानुसार सदर बेकायदेशीर बांधकामाविरुद्ध पुढील आवश्यक कारवाई सुरू केली जाईल, असे सूचनेत म्हटले आहे. तक्रारींना त्वरित प्रतिसाद देत, पंचायतीने शनिवार, २५ ऑक्टोबर रोजी दुपारी ४ वाजता जागेची तपासणी करण्याचे नियोजन केले आहे. मालमत्ता मालक किंवा त्यांच्या अधिकृत प्रतिनिधीला संबंधित मंजुरी किंवा कागदपत्रांसह उपस्थित राहण्याचे आवाहन केले आहे.
ग्रामस्थांनी पारदर्शकतेची मागणी करत आणि समुद्राच्या इतक्या जवळ असलेल्या परिसरात कोणतीही सरकारी संस्था संरक्षक भिंतीच्या प्रकल्पाला परवानगी कशी देऊ शकते असा प्रश्न उपस्थित केल्यानंतर हे पाऊल उचलण्यात आले आहे. किनाऱ्यापासून काही मीटर अंतरावर असलेली ही जागा सीआरझेड वर्गीकरणात येते, जिथे कायमस्वरूपी बांधकामांना मनाई आहे.
दरम्यान, पंचायतीतील सूत्रांनी उघड केले की स्थानिक संस्थेने अशा बांधकामासाठी कोणत्याही परवानग्या दिल्या नव्हत्या, ज्यामुळे हे काम योग्य मंजुरीशिवाय केले जात असल्याचे सूचित होते. कार्यकर्त्यांनी गोवा कोस्टल झोन मॅनेजमेंट अथॉरिटी (जीसीझेडएमए) ला हस्तक्षेप करून कथित उल्लंघनाची स्वतंत्र चौकशी करण्याची विनंती देखील केली आहे.
गोमंतकीयांचे बांधकामे नको, दिल्लीकरांची चालतात : लोबो
रेव्होल्यूशनरी गोवन्स पक्षाचे (आरजीपी) प्रमुख मनोज परब यांच्यावर मायकल लोबो यांनी आरोप केले आहेत. माझ्यासारखा गोमंतकीय व्यक्ती एखादे बांधकाम करत असेल, तर आरजीपीच्या लोकांना पोटशूळ उठतो. पण पुणे–दिल्लीहून आलेले लोक गोव्यात मोठमोठी बांधकामे करतात, तेव्हा हेच लोक त्यांच्याकडून पैसे घेऊन सेटिंग करतात, असा आरोप कळंगुटचे आमदार मायकल लोबो यांनी केला आहे.
दक्षिण हणजूण येथील किनाऱ्याजवळील परिसरात मायकल लोबो यांचा मुलगा डॅनियल लोबो याने बांधकाम केले आहे. या कामाला स्थानिक नागरिकांनी विरोध दर्शविला. त्यानंतर आरजीपीचे प्रमुख मनोज परब यांनी घटनास्थळी भेट देऊन मायकल लोबो यांना लक्ष्य केले आणि बांधकामावर आक्षेप घेतला.
या आरोपांवर प्रत्युत्तर देताना आमदार मायकल लोबो म्हणाले की, झेडपी आणि विधानसभा निवडणुका येऊ घातल्या आहेत. त्यामुळे काही जणांकडे आता बोलण्यासारखे विषयच उरले नाहीत. यामुळेच आमचा वैयक्तिक विषय हातात घेतला आहे, असा आरोप मायकल लोबो यांनी केला.
लोबो म्हणाले, या बांधकामासाठी आम्ही सीआरझेड (कोस्टल रेग्युलेशन झोन) आणि जलस्रोत विभागाकडे परवानगी मागितली. आम्ही आमदार म्हणून नव्हे तर नागरिक म्हणून हे काम केले आहे. आमदाराच्या नावावर राजकारण करणे चुकीचे आहे, असेही लोबो यांनी म्हटले आहे.
