स्वप्निल वाळके खून प्रकरण : वडिलांच्या तब्येतीचे कारण
मडगाव : चोरीच्या उद्देशाने मडगावातील कृष्णी ज्वेलर्सचे मालक स्वप्नील वाळके यांचा खून करण्यात आला होता. याप्रकरणातील संशयित ओंकार पाटील याला वडिलांच्या आजारपणासाठी सशर्त जामीन मिळाला होता. ओंकार पाटीलने जामिनाचा गैरवापर केलेला नाही आणि सुनावणीला नियमित उपस्थित राहत असल्याने न्यायालयाने जामिनाच्या कालावधीत आणखी तीन महिने वाढ करण्याचा निर्णय घेतला आहे.
मडगावात सप्टेंबर २०२० मध्ये भरदिवसा सोन्याचे दुकान लुटण्याचा प्रयत्न झाला होता. यात कृष्णी ज्वेलर्सचे मालक स्वप्नील वाळके यांचा गोळ्या घालून खून करण्यात आला होता. या प्रकरणात पोलिसांनी संशयितांना गजाआड केले होते. यात बिहार येथील शनी कुमार, राहुल कुमार, कुंदन कुमार यांच्यासह ओंकार पाटील, मुस्तफा शेख व इव्हेंडर रॉड्रिग्ज यांना अटक करण्यात आली होती. या प्रकरणी दक्षिण गोवा जिल्हा सत्र न्यायालयात सुनावणी सुरू आहे. ओंकार पाटील याने आईला हृदयविकाराचा त्रास असून वडिलांना कर्करोगाची लागण झाली आहे. त्यांची काळजी घेण्यासाठी जामीन मिळण्यासाठी अर्ज मे महिन्यात सादर केला होता. दक्षिण गोवा जिल्हा सत्र न्यायालयाच्या न्यायाधीश यांनी संशयिताला अटीशर्तीवर जामीन मंजूर केला आहे. त्यानंतर जामीन कालावधीत वाढ करण्यात आली होती. २५ हजारांची वैयक्तिक हमी व तेवढ्याच रकमेचा हमीदार द्यावा. तसेच जामीन कालावधीत साक्षीदारांना धमकावणे किंवा पुरावे नष्ट करण्याचा प्रयत्न करू नये. त्याला केवळ वडिलांसोबत राहण्याची मुभा देण्यात येत आहे, असेही न्यायालयाकडून जामीन अर्ज मंजूर करताना नमूद केले होते.
ओंकार पाटील याने वडिलांची तब्बेत अजूनही स्थिर नसून आपणास तुरुंगात पाठवल्यास त्यांची काळजी घेणारा कुणीही नाही, त्यामुळे जामिनाच्या कालावधीत आणखी तीन महिने वाढ करण्याचा अर्ज सादर केला होता. सरकारी वकिलांनी याला आक्षेप घेतला.
ओंकार याला न्यायालयाने जामीन दिल्यानंतर त्याने स्वातंत्र्याचा गैरवापर केला असल्याचे समोर आलेले नाही. त्याशिवाय न्यायालयातील सुनावणीवेळीही उपस्थित राहिलेला होता. त्यामुळे वडिलांच्या आजारपणासाठी ओंकार याच्या जामीन कालावधीत तीन महिन्यांच्या वाढीला न्यायालयाकडून मंजुरी देण्यात आली आहे.
सरकारी वकिलांचा आक्षेप
सरकारी वकिलांनी याला आक्षेप घेत याप्रकरणातील ओंकार हा मुख्य संशयित असून वडिलांचा वैद्यकीय अहवालही सादर केला नसल्याने त्याला जामीन कालावधी वाढवून न देण्याची मागणी केली.
