झोपेत उलटी झाल्याने श्वास गुदमरून ऋषी नायरचा मृत्यू
पणजी : बिट्स पिलानीच्या विद्यार्थ्याचा मृत्यू आत्महत्या नसून आरोग्याकडे दुर्लक्षामुळे झाल्याचे शवचिकित्सा अहवालातून स्पष्ट झाले आहे. २० वर्षीय ऋषी नायर याचा मृत्यू झोपेत उलटी झाल्याने श्वास गुदमरून झाला, अशी माहिती दक्षिण गोवा जिल्हा इस्पितळातील न्यायवैद्यक विभागप्रमुख डॉ. मधु घोडकीरेकर यांनी दिली.
ऋषी नुकताच हैद्राबाद कॅम्पसमधून गोवा कॅम्पसमध्ये दाखल झाला होता. तेथे वैयक्तिक कारणास्तव तो तणावाखाली होता, अशी माहिती मिळाली होती. त्यामुळे त्याने आत्महत्या केली असावी, असा संशय सुरुवातीला व्यक्त करण्यात आला होता. परंतु शवचिकित्सा अहवालानुसार त्याच्या फुफ्फुसांमध्ये व जठरात सूज आढळून आली असून मृत्यूचा खरे कारण श्वास गुदमरल्याने झाल्याचे स्पष्ट झाले.
या घटनेनंतर त्याच्या पार्थिवावर पणजी येथील स्मशानभूमीत अंत्यसंस्कार करण्यात आले. त्याचे पालक यावेळी उपस्थित होते. ऋषीच्या मृत्यू प्रकरणाची चौकशी दक्षिण गोव्याचे जिल्हाधिकारी करणार असून सुट्टी संपल्यानंतर सोमवारीपासून ती सुरू होण्याची शक्यता आहे.
दरम्यान, गेल्या नऊ महिन्यांत बिट्स पिलानी गोवा कॅम्पसमध्ये पाच विद्यार्थ्यांचे मृत्यू झाले असून त्यापैकी तीन प्रकरणे आरोग्याकडे दुर्लक्षाशी संबंधित असल्याचेही स्पष्ट झाले आहे. त्यामुळे संस्थेतील विद्यार्थ्यांच्या आरोग्य व मानसिक तणावाच्या प्रश्नांवर पुन्हा एकदा गंभीर चर्चा सुरू झाली आहे.
