पणजी : जमीन हडप प्रकरणी विशेष पथकाने (एसआयटी) मुख्य सूत्रधार मोहम्मद सुहैल उर्फ मायकल फर्नांडिस आणि राॅयसन रॉड्रिग्ज या दोघांना वेगवेगळ्या प्रकरणात अटक केली होती. या दोघांना म्हापसा येथील प्रथमवर्ग न्यायालयाने १४ दिवसांची न्यायालयीन कोठडी ठोठावली.
एसआयटीने दिलेल्या माहितीनुसार, आसगाव येथील सर्व्हे क्रमांक ३७/४ जमीन हडप केल्या प्रकरणी अंजू डिसिल्वा यांनी २०२२ मध्ये तक्रार दाखल केली होती. त्यानुसार, संशयितांनी तिच्या पूर्वजांची आसगाव येथील सर्व्हे क्र. ३७/४ मधील २,२५० चौ. मी. जमीन बनावट दस्तावेज तयार करून हडप करण्यात आल्याचे तक्रारीत म्हटले होते. याची दखल घेऊन एसआयटीचे तत्कालीन निरीक्षक सखाराम परब यांनी २०२२ मध्ये गुन्हा दाखल करून संशयित राॅयसन रॉड्रिग्ज याला अटक केली होती. त्यानंतर न्यायालयाने त्याची जामिनावर सुटका केली. या प्रकरणी एसआयटीने मुख्य सूत्रधार मोहम्मद सुहैल उर्फ मायकल फर्नांडिस याला पंधराव्यांदा अटक केली आहे.
दरम्यान, दुसऱ्या प्रकरणी विल्मा डिसोझा यांनी तक्रार दाखल केली. तक्रारदाराच्या पूर्वजांची हणजूण येथील सर्व्हे क्रमांक ४८६/६ येथील १,८७५ चौ. मी. जमीन हडप केल्याचे म्हटले होते. तक्रारदाराच्या पूर्वजांची वरील जमीन संशयित ब्रांका दिनिज, पावलिना दिनिज, मारियानो गोन्साल्विस आणि राॅयसन रॉड्रिग्ज, मोहम्मद सुहैल उर्फ मायकल फर्नांडिस, राजकुमार मैथी, डॅनवर डिसोझा आणि इतरांनी हडप केल्याचे म्हटले होते. याची दखल घेऊन तत्कालीन एसआयटीचे निरीक्षक सूरज सामंत यांनी वरील संशयिताविरोधात गुन्हा दाखल केला होता. एसआयटीचे उपनिरीक्षक योगेश गडकर यांनी गुरुवार, ७ रोजी राॅयसन रॉड्रिग्ज याला अटक केली.
दरम्यान, अटक करण्यात आलेल्या दोघांना म्हापसा येथील प्रथमवर्ग न्यायालयाने न्यायालयीन कोठडी ठोठावली आहे.
