जमीन हडप प्रकरण : २१२.८५ कोटींची मालमत्ता तात्पुरती जप्त
पणजी : जमीन हडप प्रकरणातील मुख्य सूत्रधार रोहन हरमलकर व इतरांविरोधात सक्तवसुली संचालनालयाने (ईडी) मनी लॉन्ड्रिंग कायद्याखाली मेरशी येथील उत्तर गोवा जिल्हा व सत्र न्यायालयात आरोपपत्र दाखल केले आहे. दरम्यान, ईडीने २१२.८५ कोटी रुपयांची मालमत्ता तात्पुरती जप्त केली आहे.
या प्रकरणी प्रथम म्हापसा पोलिसांनी २०२२ मध्ये रोहन हरमलकर याच्या विरोधात एक गुन्हा दाखल केला होता. त्यानंतर जमीन हडप प्रकरणी विशेष तपास पथक (एसआयटी) स्थापन झाल्यानंतर आणखीन एक गुन्हा दाखल केला. त्यानुसार, बार्देशचे तत्कालीन उपनिबंधक अर्जुन शेट्ये यांनी ११ नोव्हेंबर २०२० रोजी म्हापसा पोलीस स्थानकात तक्रार दाखल केली होती. त्यांनी रोहन व इतरांनी हणजूण येथील सर्व्हे क्र. ४२६/५ मधील जमीन हडप केल्याचे म्हटले होते. याची दखल घेऊन म्हापसा पोलिसांनी हरमलकर याच्यासह इतरांविरोधात १६ जून २०२२ रोजी गुन्हा दाखल केला. तर, कॅनडा येथे स्थायिक जॉयसे एझाबेल पिंटो यांच्यातर्फे मुखत्यारपत्रधारक अांतोनियो डिकॉस्टा यांनी एसआयटीकडे १५ नोव्हेंबर २०२२ रोजी तक्रार केली होती. त्यात पिंटो यांची हणजूण येथे सर्व्हे क्र. ४४४/८ मधील २,४५० चौ.मी. वडिलोपार्जित जमीन आहे. ही जमीन रोहन हरमलकर व इतरांनी हडप केल्याचे म्हटले होते. याची दखल घेऊन एसआयटीने २३ मार्च २०२३ रोजी गुन्हा दाखल केला. या दोन्ही गुन्ह्या'ची ईडीने दखल घेतली असता, त्यात मनी लॉन्ड्रिंग असल्याचे समोर आले. ईडीने या प्रकरणी चौकशी सुरू केली. दरम्यान, हरमलकर याने मोठ्या प्रमाणात जमीन व्यवहार केल्याची माहिती ईडीला मिळाली. ईडीचे अतिरिक्त संचालक अवनीश तिवारी आणि उपसंचालक डाॅ. भागीरथ चौधरी यांच्या मार्गदर्शनाखाली ईडीने २४ आणि २५ एप्रिल रोजी रोहन याच्या पिळर्ण, पर्वरी, दिवाडी व इतर ठिकाणच्या घरांवर तसेच कार्यालयावर छापा टाकला. ईडीने हरमलकर याच्याकडून १ हजार कोटींपेक्षा अधिक बाजारमूल्य असलेली हणजूण, हडफडे, आसगाव व इतर ठिकाणच्या जमिनीची, तसेच ६०० कोटींपेक्षा जास्त किमतीच्या स्थावर मालमत्तांची कागदपत्रे जप्त केली.
दरम्यान, ईडीने मुख्य सूत्रधार रोहन हरमलकर व इतरांविरोधात मेरशी येथील उत्तर गोवा जिल्हा व सत्र न्यायालयात आरोपपत्र दाखल केले आहे.
रोहनला ३ जून २०२५ रोजी केली होती अटक
ईडीने हरमलकरला ३ जून २०२५ रोजी अटक केली. या प्रकरणी हरमलकर याने न्यायालयात दाखल केलेला जामीन अर्ज फेटाळून लावला. याच दरम्यान ईडीने हरमलकर याने अल्कांत्रो डिसोझा व इतरांसह षड्‌यंत्र रचून मिळवलेली २१२.८५ कोटी रुपयांची मालमत्ता तात्पुरती जप्त केली. त्यात हणजूण, रेवोडा, नादोडा, कामुर्ली, पर्रा आणि बार्देश तालुक्यातील इतर मालमत्तांचा समावेश आहे.
