तेहरान/वॉशिंग्टन : मोजतबा खामेनेई (Mojtaba Khamenei) यांनी आखाती प्रदेश आणि होर्मुझ सामुद्रधुनी (Strait of Hormuz ) परिसरात नव्या टप्प्याची सुरुवात होत असल्याचे संकेत दिले आहेत. फेब्रुवारी २८ रोजी इराण ( Iran), अमेरिका (United States) आणि इस्त्रायल (Israel) यांच्यात संघर्ष सुरू झाल्यानंतर परिस्थितीत मोठे बदल घडत असल्याचे त्यांनी आपल्या लेखी संदेशात नमूद केले.
दरम्यान, मसूद पेजेशकियन (Masoud Pezeshkian) यांनी अमेरिकेने इराणी बंदरांवर लादलेली नौदल नाकेबंदी ही आंतरराष्ट्रीय कायद्याच्या विरोधात असल्याचे स्पष्ट केले. अशा निर्बंधांमुळे आखाती प्रदेशातील पुरवठा साखळी अधिक विस्कळीत होईल, मात्र त्यातून अमेरिकेला अपेक्षित उद्दिष्ट साध्य होणार नाही, असे त्यांनी ठामपणे सांगितले.
कच्च्या तेलाच्या किमतींमध्ये ५ टक्क्यांहून अधिक वाढ
या वाढत्या तणावाचा थेट परिणाम जागतिक बाजारपेठांवरही दिसून आला. कच्च्या तेलाच्या किमतींमध्ये 5 टक्क्यांहून अधिक वाढ होत चार वर्षांतील उच्चांक गाठला, तर शेअर बाजारात घसरण नोंदवली गेली. अमेरिकेचे अध्यक्ष डोनाल्ड ट्रम्प (Donald Trump) यांनी नाकेबंदी काही महिने सुरू राहू शकते, असा इशारा दिल्याने गुंतवणूकदारांमध्ये अनिश्चिततेचे वातावरण निर्माण झाले आहे.
याच पार्श्वभूमीवर, अमेरिकेत संरक्षण धोरणावरही तीव्र राजकीय वाद रंगला आहे. संरक्षणमंत्री पेटे हेगसेठ (Pete Hegseth) यांच्यावर काँग्रेसमधील डेमोक्रॅट सदस्यांनी प्रश्नांच्या फैरी झाडल्या. उद्दिष्टे अस्पष्ट असलेल्या या संघर्षावर आणि वाढत्या खर्चावर टीका करण्यात आली. २०२७ साठी सादर करण्यात आलेल्या लष्करी अंदाजपत्रकात तब्बल १.५ ट्रिलियन डॉलरचा प्रस्ताव मांडण्यात आला असून, त्यामुळेही चर्चेला उधाण आले आहे.
एकूणच, आखाती प्रदेशातील वाढता तणाव, आर्थिक परिणाम आणि आंतरराष्ट्रीय राजकारणातील घडामोडी यामुळे जागतिक पातळीवर चिंतेचे वातावरण निर्माण झाले आहे.
