पीएसआय भरती; अर्जप्रक्रियेत बदल
पणजी : गोवा कर्मचारी भरती आयोगाने पोलीस उपनिरीक्षक (पीएसआय) पदांसाठी होणाऱ्या आगामी भरती प्रक्रियेत कार्यरत पोलीस शिपाई (पीसी), हवालदार (एचसी) आणि सहाय्यक पोलीस उपनिरीक्षक (एएसआय) यांच्यासाठी महत्त्वाची घोषणा केली आहे. आयोगाने या कर्मचाऱ्यांसाठी वयाची अट शिथिल केली असून, ऑनलाईन अर्जाच्या नमुन्यात आवश्यक बदल केले आहेत. पीएसआय पदासाठी इच्छुक असलेल्या या कर्मचाऱ्यांची किमान तीन वर्षांची सेवा पूर्ण झालेली असणे आवश्यक आहे, असे आयोगाने जारी केलेल्या अधिसूचनेत स्पष्ट केले आहे.
सेवेतील पोलीस शिपाई, हवालदार व सहाय्यक पोलीस उपनिरीक्षक यांना अर्ज करणे शक्य व्हावे म्हणून ऑनलाईन अर्जात आवश्यक ते बदल करण्यात आले आहेत. सेवेतील पोलिसांसाठी वयोमानात सूट मिळणार आहे. आर्थिकदृष्ट्या मागास (इडब्लूएस), इतर मागासवर्गीय (ओबीसी) व खुल्या (यूआर) विशिष्ट गटासाठी ४० वर्षांपर्यंतचे उमेदवार अर्ज करण्यास पात्र आहेत. तर, अनुसूचित जाती (एससी) आणि अनुसूचित जमाती (एसटी) गटातील ४५ वर्षांपर्यंतचे उमेदवार अर्ज करण्यास पात्र ठरतात, असे आयोगाने स्पष्ट केले आहे. दरम्यान, या बदलामुळे पोलीस दलातील अनेक अनुभवी आणि पात्र कर्मचाऱ्यांना पीएसआय पदासाठी अर्ज करण्याची संधी मिळणार आहे.
१८७ पदांसाठी भरती
कर्मचारी भरती आयोगाने इतर अनेक पदांसह पोलीस उपनिरीक्षकांची (पीएसआय) १८७ पदे भरण्यासाठी जाहिरात दिली आहे. १८७ पदांपैकी ३० पदे महिलांसाठी राखीव आहे. याशिवाय एससी, एसटी, ओबीसी, क्रीडापटू या गटासाठी राखीव जागा आहेत.
