अमेरिका
अमेरिकेचे वाणिज्य सचिव हॉवर्ड लुटनिक यांनी सोमवारी दावा केला की त्यांनी एकाच दिवसात १ हजार गोल्ड कार्ड विकले आहेत. एका गोल्ड कार्डची किंमत ५ दशलक्ष डॉलर्स म्हणजेच भारतीय चलनानुसार ४४ कोटी भारतीय रुपये झाली आहे. म्हणजेच फक्त एकाच दिवसात ४४ हजार कोटी रुपयांचे गोल्ड कार्ड विकले गेले. लोक गोल्ड कार्ड मिळविण्यासाठी रांगेत उभे आहेत. यावरून अमेरिकेचे राष्ट्राध्यक्ष डोनाल्ड ट्रम्प यांचा 'गोल्ड कार्ड व्हिसा' कार्यक्रम अधिकृतपणे सुरू होण्यापूर्वीच सुपरहिट झाला आहे.
विशेष म्हणजे एलन मस्क सध्या यासाठी सॉफ्टवेअर विकसित करत आहेत.
ट्रम्प सरकार १० लाख गोल्ड कार्डचे लक्ष्य ठेवून काम करत आहे. या कार्यक्रमातून उभारलेल्या पैशाचा वापर अमेरिकन सरकार देशाचे कर्ज कमी करण्यासाठी करणार असल्याचेही समोर आले आहे.
हॉवर्ड लुटनिक म्हणाले की, गोल्ड कार्ड खरेदी करणाऱ्यांना अमेरिकेत अनिश्चित काळासाठी राहण्याचा अधिकार मिळेल. कार्ड खरेदी करणाऱ्यांचीही चौकशी केली जाईल आणि ते कायदेपालन करणारे आहेत की नाही हे देखील तपासले जाईल. जर कार्ड खरेदी करणारी व्यक्ती बेकायदेशीर कामांमध्ये सहभागी असेल तर अमेरिका प्रशासन हे कार्ड कायमचे रद्द करू शकते.
गोल्ड व्हिसा कार्डमुळे नागरिकांना ग्रीन कार्डसारखे विशेष अधिकार मिळतील. या नवीन व्हिसा कार्यक्रमामुळे देशात गुंतवणूक वाढेल, त्याचबरोबर इबी-५ संबंधित फसवणूक थांबेल आणि नोकरशाहीला आळा बसेल. ट्रम्प यांनी 'गोल्ड कार्ड' हे इबी-५ व्हिसा कार्यक्रमाचा पर्याय म्हणून वर्णन केले आणि भविष्यात १ दशलक्ष गोल्ड कार्ड विकले जातील असे सांगितले. सध्या, इबी-५ व्हिसा कार्यक्रम हा अमेरिकन नागरिकत्व मिळविण्याचा सर्वात सोपा मार्ग आहे. यासाठी लोकांना १० लाख डॉलर्स (सुमारे ८.७५ कोटी रुपये) द्यावे लागतात.
अमेरिकन नागरिकत्व मिळविण्यासाठी इबी-५ कार्यक्रमावर अवलंबून असलेल्या भारतीयांसाठी 'ट्रम्प व्हिसा कार्यक्रम' खूप महाग ठरू शकतो. इबी-५ कार्यक्रम बंद केल्याने ग्रीन कार्डच्या दीर्घ प्रलंबित प्रलंबित परिस्थितीत अडकलेल्या कुशल भारतीय व्यावसायिकांचे नुकसान होऊ शकते.
रोजगार-आधारित ग्रीन कार्ड श्रेणी अंतर्गत भारतीय अर्जदारांना आधीच कित्येक वर्षे वाट पहावी लागली होती. गोल्ड कार्ड सुरू झाल्यामुळे इमिग्रेशन प्रणाली आणखी आव्हानात्मक बनू शकते, असा अंदाज वर्तवण्यात आला आहे.
गणेशप्रसाद गोगटे
