केरळमध्ये रॅगिंग; छळ करणाऱ्या ५ विद्यार्थ्यांची कारागृहात रवानगी

न्यूज डेस्क। गोवन वार्ता
कोट्टायम : केरळमधील एका सरकारी महाविद्यालयात रॅगिंगचा भयानक आणि तितकाच धक्कादायक प्रकार घडला आहे. तृतीय वर्षाच्या नर्सिंगच्या पाच विद्यार्थ्यांनी काही ज्युनियर विद्यार्थ्यांचा अत्यंत क्रूर पद्धतीने मानसिक आणि शारीरिक छळ केल्याचा आरोप आहे. आरोपी विद्यार्थी प्रथम वर्षाच्या काही विद्यार्थ्यांना नग्न करून कंपास बॉक्समधील वस्तूंनी मारहाण करायचे. पीडित विद्यार्थ्यांना सुमारे तीन महिने क्रूरपणे मारहाण करण्यात आली. आरोपी विद्यार्थ्यांनी पीडित विद्यार्थ्यांच्या गुप्तांगाला डंबेल्स बांधले होते. तक्रार दाखल झाल्यानंतर गांधीनगर पोलिसांनी पाच आरोपी विद्यार्थ्यांना अटक करून त्यांची रवानगी कारागृहात केली आहे.
रॅगिंगची ही क्रूर घटना कोट्टायम येथील सरकारी नर्सिंग महाविद्यालयात घडली आहे. या प्रकरणी तीन पीडित विद्यार्थ्यांनी कोट्टायम गांधीनगर पोलिसांकडे तक्रार दाखल केली होती. तिन्ही विद्यार्थी तिरुवनंतपुरम येथील आहेत. त्यांच्यावर नोव्हेंबर २०२४ पासून रॅगिंग सुरू होते. तक्रारीनंतर आरोपी विद्यार्थ्यांना महाविद्यालयातून निलंबित करण्यात आले असून रॅगिंगविरोधी कायद्यांतर्गत त्यांना अटक करण्यात आली आहे.
रॅगिंगअंतर्गत आरोपींनी केलेल्या क्रूर कृती...
प्रथम वर्षाच्या विद्यार्थ्यांना नग्न उभे करणे.
पीडित विद्यार्थ्यांच्या गुप्तांगातून डंबेल लटकवणे.
पीडित विद्यार्थ्यांना कंपास बॉक्समधील धारदार वस्तूंनी मारहाण करणे.
पीडित विद्यार्थ्यांच्या जखमांवर लोशन लावणे.
वेदनेमुळे ओरडत असलेल्या पीडित विद्यार्थ्यांच्या तोंडात लोशन ओतणे.
तक्रार केली तर करिअर संपवण्याची धमकी देणे.
वडिलांनी पोलिसांत तक्रारीसाठी केले प्रोत्साहित
तक्रारीत दावा करण्यात आला आहे की, रविवारी दारू खरेदी करण्यासाठी आरोपी विद्यार्थी पीडितांकडून पैसे गोळा करत होते. पैसे देण्यास नकार दिल्यामुळे काही विद्यार्थ्यांना आरोपींनी मारहाण केली होती. छळ सहन करू न शकलेल्या एका विद्यार्थ्याने त्याच्या वडिलांना हा प्रकार सांगितला. वडिलांनी त्याला पोलिसांशी संपर्क साधण्यास प्रोत्साहित केले. दरम्यान, आता पाचही आरोपी विद्यार्थी पोलीस कोठडीची हवा खात आहेत.