महिन्याभरात उत्तर गोव्यात १३.६९ लाखांच्या ड्रग्ससह १० जणांना अटक
म्हापसा : कळंगुट व म्हापसा पोलिसांनी ड्रग्स विरोधात उघडलेल्या मोहिमेअंतर्गत तिघांना अटक करण्यात आली. या कारवाईत साडेपाच लाखांचा एमडीएमए व गांजा जप्त केला आहे. एका महितीनुसार उत्तर गोवा पोलिसांनी जानेवारी महिन्यात १० गुन्हे नोंदवून तब्बल १३.६९ लाखांचा ड्रग्स हस्तगत केला. यात एका विदेशी नागरिकासह १० जणांना अटक करण्यात आली.
समोर आलेल्या महितीनुसार, शनिवारी पहाटेच्या सुमारास म्हापसा पोलिसांनी माडानी-पर्रा येथे छापा टाकला व संशयित आरोपी सुखा मसाका माझी (२९, ओडिशा) व चंदन चैतन्य सेठी (२३ रा. कळंगुट व मूळ ओडिशा) या दोघांना अटक केली. दोन्ही संशयितांकडून ३ लाख रूपये किंमतीचा साडेतीन किलो गांजा जप्त केला. संशयित आरोपी चंदन सेठी हा कळंगुट मधील एका हॉटेलमध्ये बाऊंन्सर म्हणून नोकरीला होता. तर संशयित सुखा माझी हा देखील पुर्वी कळंगुटमध्ये हॉटेलमध्ये कामाला होता.
तर दुसरी कारवाई कळंगुट पोलिसांनी नायकावाडा येथे गॅस स्टेशन जवळ छापा टाकून केली. संशयित आरोपी अखिल अनिल म्हाळसेकर (२४, रा. सांगोल्डा) या अटक करून त्याच्याकडून अडीच लाखांचा २५ ग्रॅम एमडीएमए जप्त केला. पोलीस अधीक्षक अक्षत कौशल, उपअधीक्षक संदेश चोडणकर, उपअधीक्षक विश्वेश कर्पे व निरीक्षक निखील पालेकर आणि परेश नाईक यांच्या मार्गदर्शनाखाली म्हापसा व कळंगुट पोलिसांनी ही कामगिरी केली.
दरम्यान उत्तर गोवा पोलिसांनी जानेवारी महिन्यामध्ये ड्रग्स विरोधी मोहिमेअंतर्गत १० गुन्हे नोंदवले. या गुन्ह्यांखाली १ विदेश, ५ परराज्यातील व ४ स्थानिक अशा १० जणांना अटक केली. तसेच २०४ ग्रॅम चरस, ९ किलो ८४९ ग्रॅम गांजा व २५ ग्रॅम एमडीएमए असा एकूण १३.६९ लाखांचा १०.०७८ किलो ड्रग्स जप्त केला आहे. उत्तर गोव्यात ड्रग्स तस्करीला आळा घालण्यासाठी पोलीस प्रयत्नरत आहेत. समाजाला सुरक्षित तसेच निरोगी वातावरण ठेवण्यासाठी पोलीस वचनबध्द असून ड्रग्सच्या व्यवहारांबाबत कोणतीही माहिती असल्यास नागरिकांनी पोलिसांना द्यावी, असे आवाहन पोलिसांनी केले आहे.
