युवकांनी स्थानिकाला बांधून ठेवले होते काजूच्या झाडाला
पणजी : गोव्यात पर्यटनासाठी आलेल्या युवकांना हरमल येथे मारहाण करण्याचा प्रकार घडला. यात चार युवक जखमी झाले आहेत. हे युवक गोव्याच्या सीमेजवळच्या वेंगुर्ले तालुक्यातील आहेत. सूत्रांनी दिलेल्या माहितीनुसार, हरमल येथील एका रस्त्यालगतच्या काजूच्या बागेत बसून मद्यपान करताना त्या युवकांना बागेच्या मालकाने हटकले. त्यावर युवकांनी त्याला सुरी दाखवून धमकावले आणि काजूच्या झाडाला बांधून घातले. हा प्रकार एका स्थानिकाने बघितला आणि याबाबत ग्रामस्थांना माहिती दिली. काही मिनिटांतच स्थानिक घटनास्थळी जमा झाले व त्यांनी त्या युवकांना बदडून काढले. तसेच काजू बागेच्या मालकाची सुटका केली. त्यातील चार युवकांना बराच मुका मार लागला. नंतर याबाबत मांद्रे पोलिसांना माहिती देण्यात आली. पोलिसांनी घटनास्थळी दाखल होत त्या युवकांना ताब्यात घेतले आणि उपचारांसाठी तुये येथील इस्पितळात दाखल केले. त्यांना रात्री उशिरा डिस्चार्ज देण्यात आला. पुढील तपास मांद्रे पोलीस करत आहेत.
