दिल्ली
दिल्ली विधानसभा निवडणुकीसाठी ७० मतदारसंघांतून तब्बल ६९९ उमेदवार रिंगणात आहेत. नवी दिल्ली मतदारसंघात सर्वाधिक २३, तर सर्वांत कमी ५ उमेदवार पटेलनगर आणि कस्तुरबानगर मतदारसंघांत आहेत. सत्ताधारी आप, भाजप आणि काँग्रेस या पक्षांच्या कामगिरीकडे सर्वांचे लक्ष लागून आहे.
एकूण ६९९ पैकी १२९ उमेदवारांवर फौजदारी खटले आणि गुन्हेगारी आरोप आहेत. त्यापैकी ८९ (४३ टक्के) उमेदवार आप, भाजप आणि काँग्रेस या पक्षांचे आहेत. निवडणूक आयोगाला सादर केलेल्या प्रतिज्ञापत्रांतून हे स्पष्ट झाले आहे. आपच्या ५८.५ टक्के, काँग्रेसच्या ४१.५ टक्के, तर भाजपच्या २८ टक्के उमेदवारांवर गुन्हे दाखल आहेत. आपचे प्रमुख अरविंद केजरीवाल, माजी उपमुख्यमंत्री मनीष सिसोदिया आणि सत्येंद्र जैन यांच्यासह तीन प्रमुख उमेदवारांवर भ्रष्टाचाराशी संबंधित गुन्ह्यांचा आरोप आहे. आपचे जय भगवान उपकर यांच्यावर खुनाचा प्रयत्न केल्याचा, तर सुरेंद्र भारद्वाज यांच्यावर प्राणघातक हल्ला आणि लुटमारीचा आरोप आहे. राष्ट्रीय लोकतांत्रिक पक्षाचे सुनील कुमार यांच्यावर बलात्कार, खून आणि दरोड्याचे आरोप आहेत. एआयएमआयएमचे ताहिर हुसैन आणि शिफा-उर रहमान खान यांच्यावर दंगल, दहशतवादी कारवायांसाठी निधी गोळा करणे आणि हत्येचा कट रचल्याचा आरोप आहे. काँग्रेसचे मंगेश त्यागी यांच्यावर निष्काळजीपणामुळे एकाच्या मृत्यूला जबाबदार असल्याचा गुन्हा दाखल आहे. फक्त दहा मतदारसंघ असे आहेत, जिथे एकही कलंकित उमेदवार नाही.
मागील विधानसभेत एकही सदस्य नसलेल्या काँग्रेसने पूर्वीचा बालेकिल्ला परत मिळवण्यासाठी जोरदार प्रयत्न सुरू केले आहेत. काँग्रेसचे नेते आपची तुलना भाजपशी करत जोरदार हल्ला चढवत आहेत. लोकसभा निवडणुकीवेळी ‘इंडिया’तून एकत्र दिसणारे दोन्ही पक्ष यावेळी मात्र एकमेकांवर आरोप-प्रत्यारोपांच्या फैरी झाडताना दिसत आहेत.
२०१३ पूर्वी दिल्लीत काँग्रेसला नेहमी ४० टक्क्यांहून अधिक मते मिळत होती. २०१३ मध्ये ही टक्केवारी २४.५ पर्यंत कमी झाली. त्यानंतर २०१५ मध्ये ती ९.६ टक्क्यांवर आली. २०२० मध्ये तर काँग्रेसचा मतांचा वाटा फक्त ४.२ टक्के राहिला. आताही आप आणि भाजप यांच्यातच खरी लढत असल्याचा तज्ज्ञांचा दावा असला तरी अस्तित्वाची लढाई लढत असलेल्या काँग्रेसच्या कामगिरीकडे संपूर्ण देशाचे लक्ष राहणार आहे.
प्रदीप जोशी
