प्रदेशाध्यक्ष सदानंद शेट तानावडे : कोअर समितीच्या बैठकीनंतर निर्णय
पणजी : गोव्यातील दोन्ही जिल्ह्यांसाठी भाजप अध्यक्षांच्या नियुक्तीनंतरच नवीन प्रदेशाध्यक्षाची निवड होणार आहे. ११ तारखेला दोन्ही जिल्हाध्यक्षांची निवड होणार असून त्यानंतरच पक्षश्रेष्ठी प्रदेशाध्यक्ष निवडीची तारीख निश्चित करणार आहेत, असे भाजपचे प्रदेशाध्यक्ष सदानंद शेट तानावडे यांनी सांगितले.
सुत्रांनी दिलेल्या माहितीनुसार, प्रदेशाध्यक्षपदासाठी सात उमेदवार रिंगणात असून १५ जानेवारीला निवडणूक होणार आहे.पणजी येथील भाजप गोवा प्रदेश कार्यालयात सोमवारी भाजप कोअर समितीची बैठक झाली. भाजपचे खासदार आणि सरचिटणीस अरुण सिंह यांची निरीक्षक म्हणून निवड करण्यात आली आहे. त्यांनी बूथ निवडणुका आणि आगामी जिल्हाध्यक्षांच्या निवडणुकीचा आढावा घेतला. यावेळी मुख्यमंत्री डॉ. प्रमोद सावंत, भाजप प्रदेशाध्यक्ष सदानंद शेट तानावडे यांच्यासह अन्य मंत्री, आमदार, पदाधिकारी उपस्थित होते.बैठकीनंतर तानावडे म्हणाले की, दोन्ही जिल्हाध्यक्षांच्या निवडणुकीसाठी इच्छुक उमेदवार १० जानेवारीला अर्ज दाखल करतील आणि ११ जानेवारीला नवीन जिल्हाध्यक्षांची निवड होईल. भाजपची निवडणूक प्रक्रिया पूर्ण झाल्यानंतर अध्यक्षांची निवडणूक बिनविरोध होणार आहे.दोन्ही अध्यक्षांची निवड झाल्यानंतर पक्ष नवीन प्रदेशाध्यक्षाच्या निवडीची तारीख निश्चित करेल. सुनील बन्सल हे निवडणूक अधिकारी असतील, असे तानावडे यांनी सांगितले.उत्तर गोवा जिल्हाध्यक्षपदासाठी दयानंद कारबोटकर, रुपेश कामत आणि राजसिंह राणे यांची नावे चर्चेत आहेत, तर दक्षिण गोवा जिल्हाध्यक्षपदासाठी प्रभाकर गावकर, दीपक नाईक आणि शर्मद रायतूरकर यांची नावे चर्चेत आहेत. किमान तीन नावे केंद्राकडे पाठवली जाणार असून एकावर फेरविचार करून निर्णय घेतला जाईल, असे तानावडे यांनी सांगितले.प्रदेशाध्यक्षपदासाठी अॅड. नरेंद्र सावईकर, दयानंद मांद्रेकर, दिलीप परुळेकर, बाबू कवळेकर, दयानंद सोपटे, दामू नाईक आणि गोविंद पर्वतकर यांची नावे चर्चेत आहेत. त्यांच्याशी राष्ट्रीय सरचिटणीस अरुण सिंग यांनी चर्चा केली आहे, असे तानावडे यांनी सांगितले.
कार्यकर्ते नाराज नाहीत
भाजपचे जुने नेते बहुतांश मतदारसंघात मंडल अध्यक्षपदी बसले आहेत. आमच्याकडे फक्त एक-दोन मतदारसंघात पर्याय नव्हता. पण कार्यकर्ते नाराज नाहीत, असे सदानंद शेट तानावडे यांनी सांगितले. कार्यकर्त्यांच्या मतदानानंतरच मंडळ अध्यक्षांची निवड पारदर्शक प्रक्रियेतून करण्यात आली आहे.राज्यातील ३६ मतदारसंघात नवीन समित्या स्थापन करून भाजपच्या मंडल अध्यक्षपदी नवीन अध्यक्षांची नियुक्ती करण्यात आली आहे. मात्र काँग्रेसमधून भाजपमध्ये आलेल्या बहुतांश आमदारांनी त्यांच्या मतदारसंघात अध्यक्षपदासाठी त्यांच्या पसंतीचे उमेदवार नियुक्त केल्याने व वयाच्या अटींमुळे संधी गमावली गेल्याने काही कार्यकर्त्यांमध्ये नाराजी पसरली होती, असे ते म्हणाले.
