सरसांगण सुपर सीरिज क्रिकेट : दुसर्‍या सामन्यात एमएलटी क्रिकेट विजयी
पणजी : सरसांगण सुपर सीरिज क्रिकेट २०२४-२५ च्या ७ व्या आवृत्तीत तिसर्‍या दिवशी आर्लेम क्रिकेट मैदानावर कॉमनवेल्थ फाउंटनहेड्सने विम्सन पणजी पॉवरप्लेवर ४ गडी आणि ३ चेंडू राखून विजय मिळवला. दुसर्‍या सामन्यात एमएलटी क्रिकेट क्लबने डेझर्टस् अँड मोर अव्हेंजर्सचा ८ धावांनी पराभव केला.
विम्सन पणजी पॉवरप्लेने प्रथम फलंदाजी करताना चांगली सुरुवात केली. प्रणव कामत (२० धावा, १० चेंडू, ४ चौकार) आणि प्रसाद भेंडे (१८ धावा, २२ चेंडू, २ चौकार) यांनी ३१ धावांची सलामी भागीदारी केली. मधल्या फळीने देखील योगदान दिले, त्यात वृषभ कुंकळ्येकर (१३), रसिक पै खोत (२२) आणि रौनक नारगुंडकर (१५) यांचा समावेश आहे.
पॉवरप्लेमध्ये कर्णधार अर्श सरदेसाईने २२ चेंडूंमध्ये ४० धावा ठोकल्या (२ चौकार, २ षटकार), ज्यामुळे संघ २० षटकांत ८ बाद १४१ धावांवर पोहोचला. कॉमनवेल्थ फाउंटनहेड्ससाठी पदार्पण करणारा गौरव बोरकर (३ षटकांत १० धावांत २ बळी) याची गोलंदाजीतील कामगिरी लक्षणीय होती. कर्णधार यश प्रभुगावकर (२७ धावांत २ बळी) आणि अमेय राजाध्यक्ष (२८ धावांत १ बळी) यांच्यासह साईश हेगडे, प्रतीप प्रभुगावकर आणि रघुवीर घार्से यांनी प्रत्येकी एक गडी बाद केला.
कॉमनवेल्थ फाउंटनहेड्सने सुरुवातीलाच प्रत्युत्तरात खेळताना २ गडी लवकर गमावले. त्यात विश्वास कारो (१०) आणि गौरीश शेणवी लोटलीकर (१२) यांचा समावेश होता. यामुळे ५ व्या षटकात त्यांची २ बाद ३४ अशी स्थिती झाली. त्यानंतर आदित्य प्रभुगावकर (२५ चेंडूंत ३५ धावा, ४ चौकार) आणि साईश हेगडे (३१ चेंडूंत २८ धावा, १ चौकार, १ षटकार) यांच्या ५२ धावांच्या भागीदारीने संघास स्थिरता मिळवून दिली. परंतु, नंतर १४ धावांत ३ फलंदाज गमावल्यामुळे संघ १३.३ षटकांत ४ बाद १०० असा गडगडला. याशिवाय, कर्णधार यश प्रभुगावकर फक्त ५ धावांचे योगदान देऊन बाद झाला. पण केदार कामत (नाबाद १४ धावा) याने संघाला १९.३ षटकांत ६ बाद १४२ धावांपर्यंत पोहोचवले आणि ३ चेंडू राखून संघाला विजय मिळवून दिला. पॉवरप्लेमध्ये अर्श सरदेसाई आणि प्रणव कामत यांनी प्रत्येकी २ गडी बाद केले.
वैयक्तिक बक्षिसे : सामनावीर साईश हेगडे (ड्रोगरिया कोलवाळकर), सर्वोत्तम फलंदाज अर्श सरदेसाई (प्रायॉरिटी कन्स्ट्रक्शन्स), सर्वोत्तम गोलंदाज गौरव बोरकर (वकाव). सामना दुसरा : सामनावीर मनीष पै काकोडे (ड्रोगरिया कोलवाळकर), सर्वोत्तम फलंदाज अनीश पै काकोडे (प्रायोरिटी कन्स्ट्रक्शन्स), सर्वोत्तम गोलंदाज सिद्धेश बोडके (वकाव)
एमएलटी क्लब वि. डेझर्ट्स एन मोर अव्हेंजर्स
एमएलटी क्रिकेट क्लबने फलंदाजी करताना वेगवान सुरुवात केली. सचिन सरदेसाई (२४ चेंडूंत ३५ धावा, ६ चौकार) आणि सिद्धेश सिनाय आमोणकर (२७ चेंडूंत ३३ धावा, ४ चौकार, १ षटकार) यांनी ४६ चेंडूंत ७६ धावांची सलामी भागीदारी केली. अच्युत नाईक दलालने २० धावांची योगदान दिले. तथापि, मनीष पै काकोडे (२३ चेंडूंत ३५ धावा, ४ चौकार) आणि अनीश पै काकोडे (१५ चेंडूंत ३५ धावा, २ चौकार, ३ षटकार) या काकोडे बंधुंनी एमएलटी क्रिकेट क्लबला २० षटकांत ४ बाद १९५ धावांपर्यंत पोहोचवले. लक्ष्याचा पाठलाग करणाऱ्या डेझर्ट्स एन मोरला १९.५ षटकांत १८७ धावा करता आल्या आणि एमएलटी क्रिकेट क्लब ८ धावांनी विजयी ठरला. सिद्धेश बोडकेने १८ धावांत ३ बळी घेतले.
