शाहीन आफ्रिदी पुन्हा वनडेमध्ये अव्वल

दुबई : पाकिस्तानचा वेगवान गोलंदाज शाहीन शाह आफ्रिदी पुन्हा एकदा आयसीसी वनडे गोलंदाजी क्रमवारीत पहिल्या क्रमांकावर पोहोचला आहे. आयसीसीने बुधवारी ताजी क्रमवारी जाहीर केली. बाबर आझम फलंदाजी क्रमवारीत अव्वल स्थानावर कायम आहे. यासोबतच एकदिवसीय फलंदाजी आणि गोलंदाजी क्रमवारीत पाकिस्तानी खेळाडू अव्वल स्थानावर आहेत.
दरम्यान, भारतीय कर्णधार सूर्यकुमार यादवला टी-२० फलंदाजी क्रमवारीत एक स्थान गमवावे लागले आहे. आफ्रिदीने अलीकडेच ऑस्ट्रेलियाविरुद्धच्या वनडे मालिकेत चमकदार कामगिरी केली. त्याने तीन सामन्यांत ३.७६ च्या इकॉनॉमी रेटने ८ विकेट घेतल्या. या कामगिरीमुळे आफ्रिदीने क्रमवारीत तीन स्थानांनी झेप घेतली आहे. त्याने केशव महाराजला अव्वल स्थानावरून हटवले. महाराज दोन स्थानांवरून खाली घसरले आहेत. तो तिसऱ्या क्रमांकावर पोहोचला आहे. तर राशिद खान दुसऱ्या स्थानावर कायम आहे.
आफ्रिदीने याआधी गेल्या वर्षी भारतात झालेल्या आयसीसी एकदिवसीय विश्वचषक स्पर्धेत प्रथम क्रमांकाची गोलंदाजी रँकिंग गाठली होती.
आफ्रिदीशिवाय त्याचा सहकारी गोलंदाज हरिस रौफ यालाही ऑस्ट्रेलियाविरुद्धच्या एकदिवसीय मालिकेतील उत्कृष्ट कामगिरीमुळे क्रमवारीत फायदा झाला आहे. तो १४ स्थानांवर चढून १३ व्या स्थानावर पोहोचला आहे. रौफचे हे वनडे कारकिर्दीतील सर्वोत्तम रँकिंग आहे. ऑस्ट्रेलियाविरुद्धच्या तीन सामन्यांच्या वनडे मालिकेत तो सर्वाधिक बळी घेणारा गोलंदाज ठरला होता. त्याने ५ च्या इकॉनॉमीसह गोलंदाजी केली आणि १० बळी घेतले. तो मालिकावीर ठरला.
आयसीसी क्रमवारीत ऑस्ट्रेलियाविरुद्ध मायदेशात केलेल्या चांगल्या कामगिरीचा फायदा केवळ पाकिस्तानी गोलंदाजांनाच नाही तर फलंदाजांनाही झाला आहे. नवा कर्णधार मोहम्मद रिझवान दोन स्थानांनी पुढे २३ व्या स्थानावर पोहोचला आहे. रिझवानने ३ वनडे मालिकेत ७४ च्या सरासरीने ७४ धावा केल्या आहेत.
अफगाणिस्तानचा मोहम्मद नबी वनडे अष्टपैलू खेळाडूंच्या यादीत अव्वल स्थानावर कायम आहे. झिम्बाब्वेचा सिकंदर रझाही दुसऱ्या स्थानावर कायम आहे. राशिद खानला एका स्थानाचा फायदा झाला आहे. तो तिसऱ्या स्थानावर पोहोचला आहे.
सूर्यकुमारला टी २० फलंदाजी क्रमवारीत एक स्थान गमवावे लागले आहे. तो दुसऱ्या स्थानावरून तिसऱ्या स्थानावर गेला आहे. तर इंग्लंडचा फिल सॉल्ट (दुसरा) आणि जोस बटलर (सहावा) आणि वेस्ट इंडिजचा वेगवान गोलंदाज निकोलस पूरन (१० वा) हे सध्याच्या कॅरेबियन दौऱ्यातील पहिल्या दोन सामन्यांमध्ये चांगली कामगिरी करून टॉप१० मध्ये पोहोचले आहेत.
दुसरीकडे, दक्षिण आफ्रिकेची जोडी रीझा हेंड्रिक्स आणि ट्रिस्टन स्टब्स यांना भारताविरुद्ध सुरू असलेल्या टी २० मालिकेत त्यांच्या चांगल्या कामगिरीचा फायदा झाला आहे. हेंड्रिक्सने दोन स्थानांनी १२ व्या क्रमांकावर आणि स्टब्सने १२ स्थानांनी प्रगती करत २६ व्या क्रमांकावर पोहोचले आहे.
आदिल रशीद टी २० गोलंदाजीत अव्वल
इंग्लंडचा गोलंदाज आदिल रशीदने टी-२० गोलंदाजी क्रमवारीत अव्वल स्थान कायम राखले आहे. तर श्रीलंकेच्या वानिंदू हसरंगाने चार स्थानांनी झेप घेत दुसऱ्या स्थानावर पोहोचला आहे. वेस्ट इंडिजचा गोलंदाज अकिल हुसेन यालाही क्रमवारीत एका स्थानाचा फायदा झाला आहे.