१७०० हून अधिक खेळाडूंचा समावेश : क्रीडामंत्र्यांच्या हस्ते उद्या उद्घाटन
पणजी : गोव्यातील यूटीटी नॅशनल रँकिंग टेबल टेनिस चॅम्पियनशिप २०२४ येत्या १८ ते २५ ऑक्टोबर दरम्यान मनोहर पर्रीकर इनडोअर स्टेडियम, नावेली, गोवा येथे होणार आहे. या चॅम्पियनशिपमध्ये १७०० पेक्षा जास्त खेळाडू १२ श्रेणींमध्ये तब्बल २६०० प्रवेशांमध्ये भाग घेणार आहेत. यामध्ये भारतातील टॉप स्टार्स जी साथियान, अहिका आणि सतीर्थ मुखर्जी आणि मानव ठक्कर या नामवंत खेळाडूंचा समावेश आहे.
या स्पर्धेत पुरुष विभागात, भारतातील सर्वोत्कृष्ट खेळाडूंपैकी एक म्हणून स्थान मिळालेले आणि आंतरराष्ट्रीय स्पर्धेत सातत्य राखण्यासाठी ओळखले जाणारे जी साथियान सारखे अव्वल खेळाडू या स्पर्धेत उतरणार आहेत. २१ वर्षाखालील क्रमवारीत माजी जागतिक अव्वल असलेला मानव ठक्कर आणि डावखुरा डायनॅमो मानुष शाह हे देखील आपले कौशल्य दाखवणार आहेत. इतर उल्लेखनीय खेळाडूंमध्ये अनुभवी माजी राष्ट्रीय चॅम्पियन जीत चंद्रा, अमल राज यांसह आणि आंतरराष्ट्रीय ज्युनियर स्पर्धांमध्ये अलीकडच्या यश प्राप्त केलेला युवा खेळाडू पायस जैन यांचाही या स्पर्धेत समावेश आहे.
महिलांमध्ये कझाकस्तानमधील अस्ताना येथे नुकत्याच पार पडलेल्या आशियाई टेबल टेनिस चॅम्पियनशिपमध्ये ऐतिहासिक कांस्यपदक जिंकून इतिहास रचणाऱ्या भारताच्या अहिका मुखर्जी आणि सुतीर्थ मुखर्जी, युवा स्टार दिया चितळे, बैस्या पोयमंती, पृथा वाटीकर आणि वाणी सायली याही स्पर्धेत उतरणार आहेत.
शुक्रवार दि. १८ ऑक्टोबर रोजी सकाळी १० वाजता गोव्याचे क्रीडामंत्री गोविंद गावडे यांच्या हस्ते नॅशनल रँकिंग टेबल टेनिस चॅम्पियनशिपचे उद्घाटन होणार असून, टीटीएफआयचे सरचिटणीस कमलेश मेहता आणि भारताचे माजी आंतरराष्ट्रीय खेळाडू अरविंद खुटकर, क्रीडा व युवा व्यवहार संचालक डॉ. गोवा क्रीडा प्राधिकरणाच्या कार्यकारी संचालक गीता नागवेकर, गोवा टेबल टेनिस असोसिएशनचे (जीटीटीए) अध्यक्ष सुदिन वेर्णेकर आणि जीटीटीएचे सचिव क्रिस्टोफर मिनेझिस आदी उपस्थित राहणार आहेत.
राष्ट्रीय आणि आंतरराष्ट्रीय पंच आणि पंचांसह स्पर्धा संचालक एन. गणेशन यांच्या नेतृत्वाखालील ७० तांत्रिक अधिकाऱ्यांची एक टीम, दररोज सकाळी ८ ते रात्री ९ या वेळेत सामने सुरळीतपणे पार पाडतील याची काळजी घेणार आहेत. यामध्ये गोव्यातील नऊ अधिकारी आपले कौशल्य दाखवणार आहेत. टीटीआयएफची युटीटी सोबत दीर्घकालीन भागीदारी असून ते कार्यक्रमाचे प्रायोजक आहेत. जीटीटीएने खेळाडू आणि चाहत्यांना तसेच देशासह राज्यातील खेळाडूंचा गौरव करण्यासाठी आमंत्रित केले आहे. ण दिले आहे.
स्पर्धेत गोव्यातील ५० खेळाडूंचा सहभाग
या स्पर्धेत ११ वर्षाखालील, १३ वर्षाखालील, १५ वर्षाखालील, १७ वर्षाखालील, आणि १९ वर्षाखालील तसेच युवा मुले-मुली एकेरी आणि पुरुष-महिला स्पर्धांचा समावेश आहे. हा प्रमुख टेबल टेनिस इव्हेंट भारतातील उत्कृष्ट खेळाडूंसाठी प्रेरणादायी ठरणार आहे. आठ दिवस चालणाऱ्या या स्पर्धेत गोव्याचे जवळपास ५० खेळाडू सहभागी होणार आहेत.
