गोव्यातून केरळात गांजा तस्करी, दोघांना अटक

मडगाव : गोव्यातून केरळ येथे गांजा तस्करी केली जात होती. कोकण रेल्वे पोलिसांकडून दोघा संशयितांना ताब्यात घेत चौकशीअंती ही बाब समोर आली. संशयितांकडून ८ लाख ४० हजार ९३० रुपयांचा ८.४९३ किलो गांजा जप्त करण्यात आला असून दोघांनाही अटक करण्यात आली आहे.

मिळालेल्या माहितीनुसार, मडगाव रेल्वेस्थानकावर गस्त घातली जात असतानाच फलाट क्रमांक १ वरील दोघा जणांच्या हालचाली संशयास्पद आढळल्याने कोकण रेल्वे पोलिसांकडून त्यांची चौकशी करण्यात आली. त्यांना योग्य उत्तरे देता न आल्याने त्यांना पोलिस ठाण्यात नेत चौकशी केली असता रेल्वेतून केरळला गांजा तस्करी केली जात असल्याचे सांगितले.

संशयितांच्या पिशव्यांतून ८.४९३ किलो गांजा जप्त करण्यात आला. ज्याची किंमत ८.४ लाख एवढी आहे. गांजा बाळगल्याप्रकरणी व तस्करी करत असल्याप्रकरणी कोकण रेल्वे पोलिसांकडून संजॉय प्रामाणिक (२४, रा. पश्चिम बंगाल) व सुदेश दोहरे (२४, रा. उत्तरप्रदेश) या दोघांना ताब्यात घेत रितसर अटक करण्यात आली.

ही कारवाई पोलीस अधीक्षक गुरुदास गावडे, उपअधीक्षक गुरुदास कदम यांच्या मार्गदर्शनाखाली पोलीस निरीक्षक सुनील गुडलर, पोलीस उपनिरीक्षक विप्लव वस्त, पोलीस कॉन्स्टेबल हुसेन, रागेश नाईक, सत्यवान गावकर, कुलदीप गावकर, योगेश पुजारी, स्वीझेल फर्नांडिस, हेड कॉन्स्टेबल राजेश नाईक व होमगार्ड गोकुळदास गावकर यांनी केली.