टोकियो ऑलिम्पिकच्या पुनरावृत्तीची देशाला आस : स्पर्धेत भारताचे ११७ खेळाडू
पॅरिस : पॅरिस ऑलिम्पिक २०२४ क्रीडा स्पर्धेला प्रारंभ झाला आहे. या जागतिक स्पर्धेत भारताचे ११७ खेळाडू सहभागी होत असून ते आपली सर्वोत्तम कामगिरी करण्यासाठी सज्ज आहेत. भारताने टोकियो ऑलिम्पिकमध्ये सर्वोत्तम कामगिरी केली आणि सात पदके जिंकली. यावेळी भारतीय खेळाडूंचे लक्ष्य पदकांची संख्या दुहेरी अंकावर नेण्याचे असेल.
भारतीय ऑलिम्पिक संघटनेने (आयओए) ११७ खेळाडूंचा ताफा पॅरिसला पाठवला आहे. यापैकी ७० खेळाडू पहिल्यांदाच ऑलिम्पिकमध्ये खेळणार आहेत. ४७ भारतीय खेळाडू आहेत ज्यांनी ऑलिम्पिकमध्ये एक किंवा अधिक वेळा भाग घेतला आहे. पॅरिस ऑलिम्पिकमध्ये नीरज चोप्रा, मीराबाई चानू, लोव्हलिना आणि पीव्ही सिंधू यांच्याकडून पुन्हा एकदा पदकांची अपेक्षा आहे.
भारताने आतापर्यंत जिंकली एकूण ३५ पदके
भारताने आतापर्यंत ऑलिम्पिकमध्ये एकूण ३५ पदके जिंकली आहेत. यामध्ये १० सुवर्ण, नऊ रौप्य आणि १६ कांस्य पदकांचा समावेश आहे. २०२० टोकियो ऑलिंपिक भारताचे आतापर्यंतचे सर्वात मोठे होते, ज्यामध्ये देशाने एक सुवर्ण, दोन रौप्य आणि चार कांस्य पदकांसह एकूण सात पदके जिंकली. यावेळी भारतीय खेळाडू आपल्या देशाला दुहेरी आकडा गाठून देण्याचा प्रयत्न करतील.
टोकियो ऑलिम्पिकमध्ये भारताला सात पदके
२०२० च्या टोकियो ऑलिम्पिकमध्ये भारताने एकूण सात पदके जिंकली होती. ऑलिम्पिकच्या इतिहासातील ही भारताची सर्वोत्तम कामगिरी ठरली. नीरज चोप्राने १३ वर्षांनंतर ऑलिम्पिकमध्ये भारतासाठी सुवर्णपदक जिंकले. यापूर्वी २००८ मध्ये अभिनव बिंद्राने नेमबाजीत सुवर्णपदक जिंकले होते. अभिनवनंतर वैयक्तिक स्पर्धेत सुवर्णपदक जिंकणारा नीरज हा दुसरा खेळाडू आहे. पॅरिसमध्येही त्याच्याकडून अशीच कामगिरी अपेक्षित आहे. त्याचबरोबर भारताने टोकियोमध्ये दोन रौप्य आणि चार कांस्यपदकेही जिंकली.
पॅरिसमध्ये भारताचा प्रवास सोपा नसेल!
खेळाडूंना परदेशात सराव करणे असो किंवा त्यांना सर्वोत्तम सुविधा उपलब्ध करून देणे असो, यात कोणतीही कसर सोडली नाही आणि आता निकाल देणे हे खेळाडूंचे काम आहे. पण टोकियो ऑलिम्पिकच्या सात पदकांच्या संख्येची बरोबरी करणे सोपे नाही. भालाफेकमध्ये सध्याचा ऑलिम्पिक चॅम्पियन नीरज चोप्रा सोडला तर अन्य कोणताही खेळाडू पदकाचा प्रबळ दावेदार नाही. इतर खेळांमध्येही हीच परिस्थिती कमी-अधिक आहे . अशा प्रकारे पाहिल्यास भारताला पुढे नेण्याची जबाबदारी पदार्पण करणाऱ्या खेळाडूंवर असेल.
