नुकत्याच पार पडलेल्या टी-२० विश्वचषकानंतर आयसीसीच्या टी-२०रॅंकिंगमध्ये जबरदस्त बदल घडून आला आहे. भारतीय संघातील खेळाडूंसाठी तर जणू आकाशच ठेगणे झाले आहे. भारताचा स्टार खेळाडू हार्दिक पंड्याने अष्टपैलूंच्या यादीत तब्बल २ स्थानांची झेप घेत अव्वल स्थान पटकावले आहे. हार्दिक पंड्या आणि श्रीलंकेचा वानिंदू हसरंगा यांचे रेटिंग समान असले तरी, हार्दिकला आयसीसीने पहिल्या क्रमांकावर ठेवले आहे. जर आपण उर्वरित खेळाडूंच्या रॅंकिंगमध्ये देखील जबरदस्त बदलत पहायला मिळत आहेत.
आयसीसीने जाहीर केलेल्या टी२० मधील अष्टपैलू खेळाडूंच्या क्रमवारीत हार्दिक पांड्या २२२ च्या रेटिंगसह अव्वल स्थानी आहे. त्याने दोन स्थानांनी झेप घेतली आहे. हार्दिक पांड्याने टी-२० विश्वचषकाच्या उपांत्य फेरीत आणि त्यानंतरच्या अंतिम फेरीत अप्रतिम कामगिरी केली होती. सामन्याचे शेवटचे षटक टाकत असताना भारतीय संघाला चॅम्पियन बनवण्यातही त्याचे मोठे आणि महत्त्वाचे योगदान होते. यासोबतच वानिंदू हसरंगा देखील २२२ रेटिंगसह हार्दिकसह पहिल्या स्थानावर आहे.
ऑस्ट्रेलियाचा ऑस्ट्रेलियाचा मार्कस स्टॉयनिसने एका स्थानाची झेप घेतली आहे. तो आता या यादीत २११ रेटिंगसह तिसऱ्या स्थानी आहे. झिम्बाब्वेच्या सिकंदर रझालाही एका स्थानाचा फायदा झाला आहे. तो २१० रेटिंगसह चौथ्या क्रमांकाचा अष्टपैलू खेळाडू बनला आहे. तर बांगलादेशचा शाकिब अल हसन २०६ रेटिंगसह पाचव्या क्रमांकावर पोहोचला आहे.
दरम्यान, अफगाणिस्तानच्या मोहम्मद नबीचे नुकसान झाले आहे. त्याचे रेटिंग २०५ असून तो ४ स्थानांनी घसरून सहाव्या स्थानावर आला आहे. नेपाळचा दीपेंद्र सिंग १९९ रेटिंगसह सातव्या क्रमांकावर कायम आहे. इंग्लंडच्या लियाम लिव्हिंगस्टनने एका स्थानाची प्रगती केली आहे. तो आता १८७ रेटिंगसह आठव्या क्रमांकावर आहे. दक्षिण आफ्रिकेचा एडन मार्कराम १८६ रेटिंगसह ९व्या क्रमांकावर आहे. त्यालाही एका जागेचे नुकसान झाले आहे. इंग्लंडचा मोईन अली आता नवव्या स्थानावरून घसरत दहाव्या स्थानावर आला आहे. त्याचे रेटिंग १७४ आहे.