गोव्यात एकाच दिवसात १,२३८ म्युटेशन निकाली

गोवन वार्ता प्रतिनिधी | पणजी : गोव्यात शनिवारी आयोजित करण्यात आलेल्या विशेष मोहिमेत एकाच दिवसात तब्बल १,२३८ म्युटेशन प्रकरणे निकाली काढण्यात आली आहेत. गेल्या काही वर्षांत एकाच दिवसात एवढ्या मोठ्या प्रमाणात म्युटेशन प्रकरणांचा निपटारा करण्याची ही पहिलीच वेळ असल्याचे सांगण्यात आले. प्रलंबित कामांना गती मिळाल्याने नागरिकांना मोठा दिलासा मिळाला आहे.

या विशेष मोहिमेअंतर्गत उत्तर गोव्यात एकाच दिवसात ५३२ म्युटेशन प्रकरणे निकाली काढण्यात आली. यामध्ये बार्देश तालुक्यात सर्वाधिक १७२ प्रकरणे निकाली काढण्यात आली. पेडणे तालुक्यातील १४०, तिसवाडीतील ९५, डिचोलीतील ९१ आणि सत्तरीतील ३४ प्रकरणांचा समावेश आहे. गोव्यातील सर्व तालुक्यांमध्ये प्रलंबित असलेल्या म्युटेशन प्रकरणांचा निपटारा करण्यासाठी ही विशेष मोहीम राबविण्यात आली.

दक्षिण गोव्यातही या मोहिमेत मोठ्या प्रमाणात प्रकरणे निकाली काढण्यात आली. फोंडा तालुक्यातील प्रलंबित प्रकरणांवरही कार्यवाही करण्यात आली. सासष्टी, मुरगाव, धारबांदोडा, केपे, काणकोण आणि सांगे तालुक्यांतील मामलेदारांनीही म्युटेशन प्रकरणांचा निपटारा केला.