अहमदाबाद : बँकॉकहून अहमदाबाद विमानतळावर आलेल्या मुंबईतील एका ४१ वर्षीय प्रवाशाकडून तब्बल ८.९ कोटी रुपये किमतीचा हायड्रोपोनिक गांजा जप्त करण्यात आला. या प्रकरणी इम्रान शेख याला अटक करण्यात आली आहे. ही कारवाई अहमदाबाद सीमाशुल्क विभागाच्या एअर इंटेलिजन्स युनिटने (एआययू) केली.
अधिकाऱ्यांनी दिलेल्या माहितीनुसार, संशयावरून इम्रान शेख याच्या सामानाची तपासणी करण्यात आली. त्यावेळी कपड्यांमध्ये लपवून ठेवलेली १४ हवाबंद प्लास्टिक पाकिटे आढळून आली. या पाकिटांमध्ये हिरव्या रंगाचा संशयास्पद पदार्थ होता.
प्राथमिक तपासणीत हा पदार्थ गांजा असल्याचे स्पष्ट झाले. एकूण सुमारे ८.९ किलो गांजा जप्त करण्यात आला असून, त्याची अंदाजे किंमत ८.९ कोटी रुपये असल्याचे अधिकाऱ्यांनी सांगितले.
बँकॉकहून विमानाने अहमदाबादला पोहोचल्यानंतर आरोपीने हा प्रतिबंधित पदार्थ आपल्या चेक-इन सामानातून आणल्याचा आरोप आहे. सीमाशुल्क अधिकाऱ्यांनी गांजा जप्त करून आरोपीला ताब्यात घेतले. या प्रकरणी आरोपीविरोधात अमली पदार्थ आणि तत्सम (NDPS) कायद्यांतर्गत गुन्हा दाखल करण्यात आला असून, पुढील तपास सुरू आहे.