नवी दिल्ली : आशियाई क्रीडा स्पर्धा २०२६ मधील महिला क्रिकेटचा अंतिम सामना मंगळवारी भारत आणि श्रीलंका यांच्यात खेळवला जाणार आहे. जपानमधील कोरोगी स्पोर्ट्स पार्क, निश्शिन येथे हा सामना होणार असून, हाँगझोऊ २०२३ च्या सुवर्णपदक सामन्याची पुनरावृत्ती या निमित्ताने पाहायला मिळणार आहे. गतविजेता भारतीय संघ टी-२० मधील सलग आठव्या विजयासाठी आणि सुवर्णपदक कायम राखण्यासाठी मैदानात उतरणार आहे.
गतविजेत्या भारतीय महिला संघाने या स्पर्धेत आपल्या खेळाची जबरदस्त छाप सोडली आहे. उपांत्यपूर्व फेरीत भारताने यजमान जपानचा ८ गडी राखून पराभव केला, तर उपांत्य फेरीत बांगलादेशविरुद्ध तब्बल ११४ धावांच्या मोठ्या फरकाने दणदणीत विजय मिळवून अंतिम फेरीत धडक मारली.
दुसरीकडे, श्रीलंका संघानेही अत्यंत प्रभावी कामगिरी केली आहे. उपांत्यपूर्व फेरीत मलेशियन संघाचा ८६ धावांनी पराभव केल्यानंतर, उपांत्य फेरीत त्यांनी पाकिस्तानचा ८ गडी राखून सहज पराभव केला. या निकालांमुळे आयची-नागोया २०२६ मधील महिला क्रिकेटचे अंतिम चित्र अगदी हांगझोउ स्पर्धेसारखेच पाहायला मिळत आहे. यापूर्वी, याच महिन्याच्या सुरुवातीला दुबईत झालेल्या आशिया कपच्या अंतिम फेरीतही भारत आणि श्रीलंका संघ आमनेसामने आले होते. त्या सामन्यात भारताने ७२ धावांनी दणदणीत विजय मिळवत आशिया कप उंचावला होता.
भारतीय संघाची सलामीवीर शेफाली वर्मा सध्या भरात असून ती अत्यंत घातक फॉर्ममध्ये आहे. आशिया कपच्या उपांत्य आणि अंतिम फेरीत सलग अर्धशतके झळकावणाऱ्या २२ वर्षीय शफालीने आशियाई क्रीडा स्पर्धेतही जपानविरुद्ध नाबाद ४० आणि बांगलादेशविरुद्ध स्फोटक शतक ठोकत आपली क्षमता सिद्ध केली आहे. याशिवाय, स्मृती मानधाना हिनेही वेळोवेळी संघासाठी मोलाचे योगदान दिले आहे.
गोलंदाजीत भारताची मदार अनुभवी फिरकीपटू दीप्ती शर्मा आणि युवा गोलंदाज श्री चरणी यांच्यावर असेल. या दोन्ही गोलंदाजांनी संपूर्ण स्पर्धेत सातत्यपूर्ण कामगिरी करत महत्त्वाच्या वेळी विकेट्स मिळवून दिल्या आहेत. कर्णधार हरमनप्रीत कौरच्या नेतृत्वाखाली भारतीय संघ सुवर्णपदक कायम ठेवण्यासाठी पूर्णपणे सज्ज झाला आहे.
श्रीलंका संघाची मदार प्रामुख्याने त्यांची कर्णधार आणि दिग्गज अष्टपैलू खेळाडू चामरी अटापट्टू हिच्यावर असेल. चामरी ही सध्या या स्पर्धेत सर्वाधिक धावा करणारी फलंदाज असून तिने २ सामन्यांत १४६ धावा केल्या आहेत. तसेच, गोलंदाजीतही तिने ३ बळी टिपले आहेत. भारतीय संघाला पराभूत करायचे असेल, तर चामरी अटापट्टूला लवकर बाद करणे श्रीलंकेसाठी अत्यंत गरजेचे ठरणार आहे.
भारत आणि श्रीलंका यांच्यातील हा अटीतटीचा सुवर्णपदकाचा सामना भारतीय वेळेनुसार सकाळी १०.३० वाजता सुरू होईल. क्रिकेटप्रेमींसाठी या सामन्याचे थेट प्रसारण खालीलप्रमाणे उपलब्ध असणार आहे. सोनी लिव्ह या अॅप आणि वेबसाइटवर सामन्याचे थेट प्रक्षेपण पाहता येईल. भारतात सोनी स्पोर्ट्स १ या टीव्ही चॅनेलवर हा सामना थेट पाहता येईल. हिंदी भाषेतून पाहण्यासाठी सोनी स्पोर्ट्स ३ आणि सोनी स्पोर्ट्स ३ एचडी, तर तमिळ, तेलगू आणि कन्नड भाषांसाठी सोनी स्पोर्ट्स ४ वर सामन्याचा आनंद घेता येईल.
हेड-टू-हेड आकडेवारी
महिला टी-२० क्रिकेटच्या इतिहासात भारत आणि श्रीलंका यांच्यातील सामने नेहमीच रंगतदार झाले आहेत. मात्र, या आकडेवारीवर नजर टाकल्यास भारतीय संघाचे पारडे खूप जड असल्याचे दिसून येते. दोन्ही संघांमध्ये आतापर्यंत ३१ टी-२० सामने खेळले गेले आहेत. यातील तब्बल २५ सामन्यांत भारतीय संघाने विजय मिळवला आहे. श्रीलंका संघाला ५ सामन्यांत विजय मिळवता आला आहे, तर १ सामना अनिर्णित राहिला. भारताने श्रीलंकेविरुद्ध सलग शेवटचे ७ सामने जिंकले असून, २०२४ नंतर श्रीलंका संघ भारताला एकदाही पराभूत करू शकलेला नाही.
भारतीय महिला संघ :
हरमनप्रीत कौर (कर्णधार), ऋचा घोष (यष्टिरक्षक), गुनालन कमलिनी (यष्टिरक्षक), स्मृती मानधाना, शेफाली वर्मा, भारती फुलमाळी, दिप्ती शर्मा, अरुंधती रेड्डी, श्रेयंका पाटील, श्री चरणी, नंदानी शर्मा, क्रांती गौड, रेणुका सिंह ठाकूर, राधा यादव
श्रीलंका महिला संघ
चामरी अटापट्टू (कर्णधार), कौशानी नुथ्यांगना (यष्टिरक्षक), अनुष्का संजीवनी (यष्टिरक्षक), इमेषा दलानी, हसिनी परेरा, हर्षिता समरविक्रमा, हांसिमा करुणाकरत्ने, संजना कवींदी, काविशा दिलहारी, रश्मिका सेववंदी, मिथाली अयोध्या, काव्या कवींदी, चामुडी प्रबोधा, सुगंधिका कुमारी, निमाशा मीपागे