सासष्टीत दोन महिन्यांत ६ लाखांहून अधिक वाहतूक नियमभंगाचे प्रकार

मडगाव :सासष्टी तालुक्यातील १६ प्रमुख ठिकाणी बसवण्यात आलेल्या ‘एआय’ आधारित वाहतूक पाळत ठेवणाऱ्या कॅमेऱ्यांनी १५ जून ते १३ ऑगस्ट या दोन महिन्यांच्या कालावधीत तब्बल ६.१९ लाख वाहतूक नियमांच्या उल्लंघनांची नोंद केली आहे. अधिकृत आकडेवारीनुसार, हे प्रमाण दररोज सरासरी १०,३२७ उल्लंघनांचे ठरते.

राज्यात ‘एआय’द्वारे पाळत ठेवणारे कॅमेरे एकूण २६ ठिकाणी बसवण्यात आले असून, त्यापैकी बहुतांश म्हणजेच १६ ठिकाणे ही एकट्या सासष्टी भागात आहेत. विधानसभेच्या नुकत्याच पार पडलेल्या अधिवेशनात फातोर्डाचे आमदार विजय सरदेसाई यांनी विचारलेल्या अतारांकित प्रश्नाला उत्तर देताना वाहतूक मंत्री माविन गुदिन्हो यांनी ही माहिती दिली.

मोटार वाहन कायदा १९८८ चे कलम १३६ए आणि केंद्रीय मोटार वाहन नियम १९८९ चे नियम १६७ए अन्वये हे कॅमेरे बसवण्यास परवानगी देण्यात आल्याचे त्यांनी सभागृहात स्पष्ट केले.

सासष्टीतील १६ ठिकाणी कॅमेऱ्यांची नजर

सासष्टी भागात नुवे महामार्ग परिसरात ४, नावेली, मडगाव, फातोर्डा व बाणावली येथे प्रत्येकी २ आणि बेताळभाटी व लोटली येथे प्रत्येकी १ ठिकाणी हे कॅमेरे कार्यरत आहेत.

हे कॅमेरे ‘सीपी प्लस ए अँड सी’ सीरिजचे नेटवर्क कॅमेरे असून, त्यात ‘इनोफ्युजन’ चिपसेट बसवण्यात आले आहेत. इलेक्ट्रॉनिक मॉनिटरिंग आणि रस्ते सुरक्षेसाठी सामान्य सीसीटीव्ही फुटेज एका आठवड्यासाठी साठवले जाते, तर वाहतूक नियमांचे उल्लंघन दर्शवणारे फुटेज कायमस्वरूपी जतन करून ठेवले जाते.

गुन्ह्यांच्या तपासासाठी हे फुटेज पोलीस किंवा तपास यंत्रणांना उपलब्ध करून दिले जाऊ शकते.

एकंदरीत आकडेवारी