पणजी : आंबेखण-सुकूर, पर्वरी येथे दोन दुचाकींच्या भीषण धडकेनंतर ओढ्यात कोसळून बेपत्ता झालेल्या आकाश विश्वकर्मा (३० वर्षे, पश्चिम बंगाल) या युवकाचा मृतदेह अखेर सापडला. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, दोन दुचाकींची समोरासमोर धडक झाल्यानंतर आकाश विश्वकर्मा याचा दुचाकीवरील ताबा सुटला आणि तो रस्त्यालगतच्या ओढ्यात कोसळला. अपघातानंतर तो बेपत्ता झाल्याने स्थानिक नागरिकांनी तातडीने पोलीस आणि अग्निशामक दलाला माहिती दिली.
यानंतर अग्निशामक दलाचे जवान, पोलीस आणि स्थानिक नागरिकांनी संयुक्तपणे शोधमोहीम हाती घेतली. अनेक तासांच्या शोधानंतर ओढ्यातून आकाश विश्वकर्मा यांचा मृतदेह बाहेर काढण्यात आला.
मृतदेह पंचनामा करून पुढील वैद्यकीय व कायदेशीर प्रक्रिया पूर्ण करण्यासाठी रुग्णालयात पाठविण्यात आला आहे. अपघाताचे नेमके कारण आणि इतर बाबींचा तपास पोलिसांकडून (Goa Police) सुरू आहे.