महाराष्ट्र टीईटी पेपरफुटी प्रकरणातील मुख्य सूत्रधाराला बिहारमधून अटक

मुंबई : नीट परीक्षेतील पेपरफुटीनंतर सध्या मोठे आंदोलन सुरू आहे. नीट परीक्षेतील पेपरफुटीनंतर महाराष्ट्रात शिक्षक पात्रता (TET) परीक्षा पेपरफुटीचे प्रकरण घडले होते. याप्रकरणातील मुख्य आरोपी बिरेंद्र कुमार गुप्ता याला महाराष्ट्र पोलिसांनी बिहारमधून अटक केली आहे. (The main accused in the Maharashtra TET paper leak case, Birendra Kumar Gupta, has been arrested by the Maharashtra Police in Bihar).

अनेक महिन्यांपासून फरार असलेल्या गुप्ताला शनिवारी सकाळी बिहारमध्ये ताब्यात घेण्यात आले. त्यानंतर त्याला पुणे विमानतळावर आणण्यात आले. पुढील चौकशीसाठी भिवंडी येथे नेले जाणार आहे. या प्रकरणात यापूर्वीच अनेक आरोपींना अटक करण्यात आली आहे. त्यामध्ये गुप्ताची पत्नी सुमन गुप्ता हिचाही समावेश आहे.  पेपरफुटी रॅकेटच्या कामकाजात तिची भूमिका असल्याचा संशय पोलिसांना आहे. तिच्या सहभागाबाबतचा तपास अद्याप सुरू आहे.

याआधी महाराष्ट्र पोलिसांनी बिहार आणि पंजाबमधून कपिल दहिया, मिथुन सिंग आणि सोनू सिंग या तिघांनाही अटक केली होती. तपासात हे तिघेही पेपर मिळवणे, छपाई करणे आणि परीक्षा होण्यापूर्वी तो विविध ठिकाणी पोहोचविण्याच्या साखळीत वेगवेगळ्या भूमिका बजावत असल्याचा संशय व्यक्त करण्यात आला आहे.

तपास यंत्रणांच्या माहितीनुसार, प्रश्नपत्रिकांच्या छपाईसाठी वापरण्यात आलेल्या सुविधांचा संबंध सोनू सिंगशी असल्याचा संशय आहे. तसेच, समस्तीपूर येथील बिरेंद्र गुप्ता आणि सोनू सिंग यांची अनेक वर्षांपासून ओळख असल्याचेही तपासात समोर आले आहे. त्यामुळे या दोघांच्या आर्थिक व्यवहारांसह परस्पर संबंधांची सखोल चौकशी सुरू आहे.

महाराष्ट्र पोलिसांनी या प्रकरणाचा तपास अनेक राज्यांमध्ये विस्तारला आहे.  प्रश्नपत्रिकांची गळती कशी झाली, त्यामागील आर्थिक व्यवहार, मध्यस्थांची भूमिका आणि संपूर्ण रॅकेटचे जाळे उघड करण्यासाठी तपासाची व्याप्ती वाढविण्यात आली आहे.

२०२४ पासून तपास यंत्रणांच्या रडारवर 

दरम्यान, २०२४ मध्ये एका स्टिंग ऑपरेशननंतर बिरेंद्र गुप्ताचे नाव परीक्षा गैरव्यवहारांशी संबंधित प्रकरणांमध्ये समोर आले होते. त्यानंतर तो तपास यंत्रणांच्या रडारवर होता. महाराष्ट्र राज्य परीक्षा परिषद (MSCE) आयोजित २८ जून रोजी होणारी महाराष्ट्र टीईटी परीक्षा प्रश्नपत्रिका फुटल्याच्या आरोपांनंतर पुढे ढकलण्यात आली होती. या प्रकरणामुळे राज्यातील शिक्षक भरती प्रक्रियेच्या पारदर्शकतेवर गंभीर प्रश्नचिन्ह निर्माण झाले.  संपूर्ण रॅकेट उघडकीस आणण्यासाठी तपास यंत्रणा कसून चौकशी करत आहेत.