आंदोलकांकडून पोलिसांवर दगडफेक; दिल्ली पोलिसांचे एक सब-इन्स्पेक्टर जखमी
नवी दिल्ली: नीट (NEET) पेपर लीक प्रकरणावरून केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत आज दिल्लीत 'कॉकरोच जनता पार्टी' (CJP) तर्फे काढण्यात आलेल्या आंदोलनाला अत्यंत उग्र वळण लागले. सुमारे १५ हजारांहून अधिक आंदोलकांनी संसद भवनाच्या दिशेने कूच केल्याने दिल्लीत प्रचंड तणाव निर्माण झाला. आंदोलकांना रोखण्यासाठी पोलिसांना अश्रूधुराच्या नळकांड्या फोडाव्या लागल्या, तर दुसरीकडे परिस्थितीचे गांभीर्य ओळखून गृहमंत्री अमित शाह आणि शिक्षणमंत्री धर्मेंद्र प्रधान यांच्यात संसदेत तातडीची बैठक पार पडली.
संसदेपासून ५० मीटरवर रोखले; पोलिसांवर दगडफेक
आंदोलकांनी संसदेच्या दिशेने कूच केल्यानंतर सुरक्षा यंत्रणांची एकच पळापळ झाली. संसदेपासून अवघ्या ५० मीटर अंतरावर असलेल्या रेल भवनजवळ पोलिसांनी बॅरिकेड्स लावून आंदोलकांना रोखले. यादरम्यान पोलीस आणि आंदोलकांमध्ये तीव्र झटापट झाली. संतप्त आंदोलकांनी केलेल्या दगडफेकीत दिल्ली पोलिसांचे एक सब-इन्स्पेक्टर जखमी झाले आहेत. परिस्थिती नियंत्रणात आणण्यासाठी 'क्यूआरटी' (QRT) आणि 'सीआयएसएफ' (CISF) च्या जवानांनी तात्काळ मोर्चा सांभाळत संसदेचा गेट नंबर १ पूर्णपणे बंद केला. अनेक आंदोलकांना पोलिसांनी ताब्यात घेतले आहे.
अभिजीत दीपके यांचे उपोषण मागे; वांगचूक अजूनही रुग्णालयात
याच आंदोलनादरम्यान, मागील ४८ तासांपासून बेमुदत उपोषणाला बसलेले सीजेपीचे नेते अभिजीत दीपके यांनी आपले उपोषण मागे घेतले आहे. दुसरीकडे, सक्तीने रुग्णालयात दाखल करण्यात आलेले सामाजिक कार्यकर्ते सोनम वांगचूक अजूनही सफदरजंग रुग्णालयात उपचार घेत आहेत. वांगचूक यांच्या पत्नी गीतांजली आंग्मो यांनी या परिस्थितीवर तीव्र संताप व्यक्त केला असून, "नागरिकांना आपल्या रास्त मागण्यांसाठी अशा प्रकारे रस्त्यावर उतरावे लागणे दुर्दैवी आहे," असे म्हटले आहे.
सरकारकडून चर्चेची तयारी; नड्डा घेणार भेट?
दिल्लीतील वाढता संताप आणि कायदा-सुव्यवस्थेचा प्रश्न पाहता दिल्ली पोलीस आयुक्तांनी स्वतः पार्लियामेंट स्ट्रीट पोलीस ठाण्यात जाऊन सुरक्षा व्यवस्थेचा आढावा घेतला. दरम्यान, सीजेपीचे प्रवक्ते सौरभ दास यांनी दावा केला आहे की, सरकारने त्यांच्या शिष्टमंडळाला चर्चेसाठी बोलावले असून केंद्रीय मंत्री जे. पी. नड्डा यांच्यासोबत त्यांची बैठक होण्याची शक्यता आहे. या प्रक्रियेमुळे दिल्लीतील राजकीय वातावरण आणि आंदोलनाचा पुढील मार्ग ठरणार आहे.
