आसाममध्ये पुराचा कहर; एकाचा मृत्यू, ५७ हजारांहून अधिक नागरिक बाधित

गुवाहाटी : आसाममधील पूरस्थिती दिवसेंदिवस गंभीर होत असून, मुसळधार पावसामुळे राज्यातील सात जिल्ह्यांमध्ये जनजीवन विस्कळीत झाले आहे. (The flood situation in Assam deteriorated with one person losing his life and the number of people affected by the deluge rising to over 57,000 across seven districts) या पुरात एका व्यक्तीचा मृत्यू झाला. राज्यभरातील बाधितांची संख्या ५७ हजारांहून अधिक झाली आहे. परिस्थितीचे गांभीर्य लक्षात घेऊन राज्य सरकारने भारतीय लष्कर आणि हवाई दलाला बचाव व स्थलांतर मोहिमेसाठी सज्ज राहण्याची विनंती केली आहे.

आसाम राज्य आपत्ती व्यवस्थापन प्राधिकरणाने (ASDMA) रविवारी प्रसिद्ध केलेल्या अहवालानुसार, शिवसागर जिल्ह्यात पुराच्या पाण्यात अडकून एका व्यक्तीचा मृत्यू झाला. यंदाच्या पूरहंगामातील मृतांचा आकडा आता पाचवर पोहोचला आहे.

५७, १०० हून अधिक नागरिक बाधित

सध्या चराईदेव, धेमाजी, डिब्रुगड, जोरहाट, शिवसागर, तिनसुकिया आणि उदलगुरी या सात जिल्ह्यांतील ५७,१०० हून अधिक नागरिक पुरामुळे प्रभावित झाले आहेत. शनिवारी ही संख्या सुमारे २४ हजार होती. अवघ्या एका दिवसात बाधितांची संख्या दुपटीहून अधिक वाढल्याने प्रशासनाची चिंता वाढली आहे.

मुख्यमंत्री डॉ. हिमंत बिस्वा सरमा यांनी सामाजिक माध्यमांवरून माहिती देताना सांगितले की, शिवसागर, चराईदेव आणि जोरहाट जिल्ह्यांतील परिस्थिती झपाट्याने बिघडत असल्याने भारतीय लष्कर आणि भारतीय हवाई दलाला आवश्यकतेनुसार बचावकार्य व नागरिकांच्या सुरक्षित स्थलांतरासाठी सज्ज राहण्याची विनंती करण्यात आली आहे.

पूरग्रस्त भागांतील मदतकार्याचा आढावा घेण्यासाठी आणि नागरिकांना तातडीची मदत मिळावी यासाठी मंत्री अजंता नेओग, बिमल बोरा, केशब महंता आणि सुसांत बोर्गोहाई यांना तातडीने संबंधित जिल्ह्यांत रवाना होण्याचे निर्देशही मुख्यमंत्र्यांनी दिले आहेत.

"राज्यातील प्रत्येक नागरिकाची सुरक्षितता आणि कल्याण हे सरकारचे सर्वोच्च प्राधान्य आहे. पूरस्थितीवर आम्ही चोवीस तास लक्ष ठेवून आहोत आणि जीवितहानी टाळण्यासाठी तसेच प्रत्येक पूरग्रस्त कुटुंबापर्यंत मदत पोहोचवण्यासाठी सर्वतोपरी प्रयत्न केले जातील," असे मुख्यमंत्री सरमा यांनी स्पष्ट केले.

गावांचा संपर्क तुटला

दरम्यान, अनेक भागांतील रस्ते पाण्याखाली गेल्याने वाहतूक विस्कळीत झाली असून, काही गावांचा संपर्क तुटला आहे. प्रशासनाकडून मदतछावण्या उभारण्याबरोबरच अन्न, पिण्याचे पाणी आणि वैद्यकीय सेवांचा पुरवठा सुरू करण्यात आला आहे.