नवी दिल्ली : दिल्लीतील जंतर-मंतरवरून पोलिसांनी बळजबरीने रुग्णालयात हलवलेले प्रसिद्ध पर्यावरण आणि सामाजिक कार्यकर्ते सोनम वांगचुक यांनी रुग्णालयातूनच आंदोलनाची पुढील दिशा स्पष्ट केली आहे. सफदरजंग रुग्णालयात उपचार घेत असलेल्या वांगचुक यांनी त्यांची पत्नी गीतांजली यांच्या माध्यमातून एक हस्तलिखित संदेश (पत्र) जारी केला आहे. यामध्ये त्यांनी २० जुलै रोजी होणाऱ्या संसद मार्चला 'स्वातंत्र्याचे दुसरे आंदोलन' असे संबोधत नागरिकांना यात मोठ्या संख्येने सहभागी होण्याचे आवाहन केले आहे.
पत्रात नेमके काय लिहिले आहे?
सोनम वांगचुक यांनी आपल्या पत्रात लिहिले आहे की, हे स्वातंत्र्याचे दुसरे आंदोलन आहे. जय मुक्त भारत, अन्यायमुक्त भारत! यासोबतच त्यांनी इंग्रजीमध्ये 'Freedom from injustice (Like paper leaks)' आणि 'Freedom from Fear (my illegal detention)' असे लिहिले आहे. म्हणजेच, नीट (NEET) पेपर लीकसारख्या अन्यायापासून आणि प्रशासनाकडून झालेल्या बेकायदेशीर अटकेच्या भीतीपासून देशाला मुक्ती हवी आहे, असे त्यांनी पत्रात नमूद केले आहे. हा संदेश त्यांनी रुग्णालयातील कथित बेकायदेशीर कोठडीतून पत्नीमार्फत पाठवल्याचे पत्राच्या शेवटी म्हटले आहे.
जेएनयूटीए (JNUTA) कडून पोलिसांच्या कारवाईचा तीव्र निषेध
दरम्यान, जंतर-मंतरवर शांततापूर्ण आंदोलन करणाऱ्या विद्यार्थी आणि पालकांवर दिल्ली पोलिसांनी केलेल्या कारवाईचा जवाहरलाल नेहरू विद्यापीठ शिक्षक संघाने (JNUTA) तीव्र शब्दांत निषेध केला आहे. ही कारवाई म्हणजे लोकशाहीतील असहमतीचा आवाज दाबण्याचा हुकूमशाही प्रयत्न आहे, अशी टीका संघाने केली. सरकार आता तरुणांच्या भविष्याशी जोडलेल्या या गंभीर समस्येला सोडवण्याऐवजी, आंदोलक दडपून एक जनसंपर्क (PR) संकट म्हणून पाहत आहे, असा आरोप करत जेएनयूटीएने २० जुलैच्या संसद मार्चला पूर्ण पाठिंबा जाहीर केला आहे.
सोनम वांगचुक यांची प्रकृती कशी आहे?
सफदरजंग रुग्णालयाने जारी केलेल्या हेल्थ बुलेटिननुसार, सोनम वांगचुक यांच्यावर सध्या आवश्यक ते सर्व उपचार सुरू आहेत. त्यांचे वाइटल पॅरामीटर्स (हृदयाचे ठोके, रक्तदाब इ.) स्थिर आहेत. मात्र, प्रदीर्घ उपोषणामुळे त्यांच्या रक्तातील काही घटकांचे प्रमाण सामान्य पातळीपेक्षा कमी झाले आहे. उपोषणाचा त्यांच्या शरीरावर झालेला अंतर्गत परिणाम लक्षात घेता, तज्ज्ञ डॉक्टरांचे एक विशेष पथक सातत्याने त्यांच्या आरोग्यावर देखरेख ठेवून आहे.