जंतर-मंतरवरील आंदोलनाला नवे वळण
नवी दिल्ली : जंतर-मंतर येथे गेल्या २१ दिवसांपासून बेमुदत उपोषण करणारे पर्यावरण कार्यकर्ते सोनम वांगचुक यांची प्रकृती खालावल्याने दिल्ली पोलिसांनी शनिवारी त्यांना सफदरजंग रुग्णालयात दाखल केले. (Sonam Wangchuk was admitted to Safdarjung Hospital by the Delhi Police.). दिल्ली उच्च न्यायालयाच्या निर्देशानुसार आवश्यक वैद्यकीय उपचारांसाठी त्यांना रुग्णालयात हलविण्यात आल्याचे पोलिसांनी स्पष्ट केले.
कॉकरोच जनता पक्षाचे (CJP) संस्थापक अभिजीत दिपके यांनी वांगचुक यांना रुग्णालयात हलवल्यानंतर निषेध म्हणून बेमुदत उपोषण सुरू करण्याची घोषणा केली. दिपके यांनी जंतर-मंतर आंदोलनस्थळी प्रवेश नाकारल्याचा तसेच दिल्ली पोलिसांनी मारहाण करून ताब्यात घेतल्याचा आरोप केला आहे.
वांगचुक यांच्या समर्थकांनी त्यांना पोलिसांनी जबरदस्तीने आंदोलनस्थळावरून हटवल्याचा दावा केला आहे. पत्नी गीतांजली जे. अंग्मो यांनी नंतर वांगचुक यांना सफदरजंग रुग्णालयात दाखल करण्यात आल्याची माहिती दिली. तसेच, त्यांच्या संमतीशिवाय किंवा त्यांच्या डॉक्टरांच्या सल्ल्याशिवाय कोणतेही औषध देऊ नये, अशी विनंती त्यांनी केली.
दिल्ली पोलिसांनी जंतर-मंतर परिसर रिकामा करण्याचे आवाहन करत आंदोलनस्थळी मोठा पोलीस बंदोबस्त तैनात केला आहे. २० जुलै रोजी संसदेकडे प्रस्तावित मोर्चाच्या पार्श्वभूमीवर परिसरातील सुरक्षा वाढविण्यात आली आहे.
शुक्रवारी करण्यात आलेल्या वैद्यकीय तपासणीनुसार, वांगचुक यांचे वजन २४ तासांत ३५० ग्रॅमने घटून ५६.५५ किलो झाले होते. त्यांचा रक्तदाब १०८/६८, रक्तातील साखरेची पातळी ७० mg/dL आणि नाडीचा वेग प्रति मिनिट ७२ इतका नोंदविण्यात आला होता.
रुग्णालयातील सूत्रांच्या माहितीनुसार, सोनम वांगचुक शुद्धीवर असून त्यांची प्रकृती सध्या स्थिर आहे. त्यांच्यावर डॉक्टरांच्या देखरेखीखाली उपचार सुरू आहेत.
