दिल्लीत कॉकरोच जनता पार्टीच्या (CJP) विनापरवाना संसद मार्चमुळे तणाव. जंतर-मंतरवर १० हजार आंदोलक जमले असून ५ हजार जवान तैनात. सोनम वांगचुक यांनी अनशन सोडण्यासाठी ठेवल्या ३ अटी.
नवी दिल्ली: संसदेच्या पावसाळी अधिवेशनाच्या पहिल्याच दिवशी राजधानी दिल्लीत कमालीचा तणाव निर्माण झाला आहे. शिक्षण व्यवस्थेतील सुधारणा आणि पेपर लीक प्रकरणाविरोधात कॉकरोच जनता पार्टीने (CJP) आज पुकारलेल्या 'चलो संसद' मार्चमुळे दिल्लीत हायअलर्ट जारी करण्यात आला आहे. दिल्ली पोलिसांनी या मार्चला अधिकृत परवानगी दिलेली नाही, तरीही जंतर-मंतरवर सुमारे १० हजार आंदोलक जमा झाले आहेत. सुरक्षेसाठी ५ हजारांहून अधिक पोलीस आणि निमलष्करी दलाचे जवान तैनात करण्यात आले आहेत.
सोनम वांगचुक यांच्या ३ अटी
गेल्या २३ दिवसांपासून भूक हड़तालावर बसलेले प्रसिद्ध पर्यावरण व शिक्षण कार्यकर्ते सोनम वांगचुक सध्या सफदरजंग रुग्णालयात आहेत. त्यांनी आज आपले उपोषण सोडण्यासाठी सरकार आणि खासदारांसमोर तीन प्रमुख अटी ठेवल्या आहेत:
१. सरकारने देशातील शिक्षण व्यवस्थेचे अपयश आणि पेपर लीक प्रकरणांची नैतिक जबाबदारी स्वीकारावी.
२. 'CJP' च्या प्रतिनिधीमंडळाला संसदेत जाऊ दिले जावे आणि खासदारांनी हा मुद्दा संसदेत उठवण्याचे आश्वासन द्यावे.
३. तब्येतीच्या कारणास्तव संसदेत जाणे शक्य न झाल्यास, विविध पक्षांच्या खासदारांनी स्वतः सफदरजंग रुग्णालयात येऊन हे आश्वासन द्यावे.
दरम्यान, रुग्णालयात आपल्याला बेकायदेशीरपणे डांबून ठेवले असून आपली अभिव्यक्ती स्वातंत्र्य हिरावली असल्याचा आरोपही वांगचुक यांनी केला आहे.
बॅरिकेडिंग तोडले; ५ मेट्रो स्टेशन्स बंद
आज सकाळी जंतर-मंतर परिसरात आंदोलकांनी पोलिसांचे बॅरिकेड्स तोडण्याचा प्रयत्न केला, ज्यामुळे काही काळ तणाव निर्माण झाला होता. मात्र, सध्या परिस्थिती नियंत्रणात आहे. सुरक्षेचा उपाय म्हणून दिल्ली मेट्रो रेल कॉर्पोरेशनने (DMRC) राजीव चौक, जनपथ, पटेल चौक, केंद्रीय सचिवालय आणि सेवा तीर्थ (सेवा भवन) ही पाच प्रमुख मेट्रो स्टेशन्स प्रवाशांसाठी बंद केली आहेत.
आंदोलन बदनाम होऊ देणार नाही: अभिजीत दिपके
'CJP' चे संस्थापक अभिजीत दिपके यांनी कार्यकर्त्यांना शांतता राखण्याचे आवाहन केले आहे. आमच्या बाजूने कोणीही चुकीचे पाऊल उचलणार नाही. सोनम वांगचुक यांनी या आंदोलनासाठी स्वतःचा जीव पणाला लावला आहे, त्यामुळे कोणत्याही परिस्थितीत हे आंदोलन बदनाम होऊ देणार नाही, असे दिपके म्हणाले. तर दुसरीकडे, सरकार चर्चेसाठी प्रयत्न करत असून अद्याप ठोस निर्णय झालेला नाही, अशी माहिती पक्षाचे प्रवक्ते सौरव दास यांनी दिली.
कलम १६३ लागू; कडक कारवाईचा इशारा
नवी दिल्ली जिल्ह्याचे पोलीस उपायुक्त (DCP) सचिन शर्मा यांनी स्पष्ट केले आहे की, आंदोलनाला कोणतीही परवानगी देण्यात आलेली नाही. संपूर्ण जिल्ह्यात कलम १६३ (BNSS) लागू करण्यात आले असून ५ किंवा त्यापेक्षा जास्त लोकांना एकत्र येण्यास बंदी आहे. आदेशाचे उल्लंघन करणाऱ्यांवर भारतीय न्याय संहितेच्या (BNS) विविध कलमांतर्गत आणि सार्वजनिक मालमत्ता नुकसान प्रतिबंधक (PDPP) कायद्यानुसार कडक कारवाई केली जाईल, असा इशारा पोलिसांनी दिला आहे.
