झार स्पोर्ट्स मॅनेजमेंटतर्फे आयोजन : देशभरातील अव्वल खेळाडू उतरणार मैदानात
पणजी : भारतातील स्नूकर आणि क्यू स्पोर्ट्स क्षेत्रातील एक अत्यंत मानाची आणि प्रतिष्ठित स्पर्धा म्हणून ओळखली जाणारी ‘मोतीलाल ओसवाल स्नूकर टूर २०२६’ येत्या २८ मे पासून अधिकृतपणे सुरू होत आहे. देशातील सर्वोत्तम आणि अनुभवी स्नूकर खेळाडू या स्पर्धेत विजेतेपदासाठी आपले कौशल्य पणाला लावणार असल्याने, भारतीय क्रीडा वर्तुळात या स्पर्धेबाबत प्रचंड उत्सुकता निर्माण झाली आहे.
झार स्पोर्ट्स मॅनेजमेंटतर्फे आयोजित करण्यात आलेली ‘मोस्ट २०२६’ ही स्पर्धा भारताच्या स्नूकर जगतातील एक मुख्य आकर्षण ठरत आहे. कॉर्पोरेट भागीदार, क्रीडाशौकीन आणि स्नूकरप्रेमींचे लक्ष या स्पर्धेकडे लागले असून, यंदाच्या आवृत्तीत अत्यंत चुरशीचे आणि हाय-कॅलिबर सामने पाहायला मिळतील. जागतिक स्तरावर भारताचे स्नूकरमधील स्थान अधिक बळकट करणे हा या आयोजनामागील मुख्य उद्देश आहे.या स्पर्धेबाबत बोलताना झार स्पोर्ट्स मॅनेजमेंटच्या आयोजकांनी विश्वास व्यक्त केला की, यंदाची आवृत्ती आजवरची सर्वात मोठी आणि कमालीची स्पर्धात्मक असेल. देशात क्यू स्पोर्ट्सची वाढती लोकप्रियता आणि त्याला मिळणारे व्यावसायिक यश या स्पर्धेतून दिसून येईल. आंतरराष्ट्रीय मानकांनुसार होणाऱ्या या स्पर्धेत हाय-क्वालिटी प्रोडक्शन आणि जागतिक दर्जाचे वातावरण खेळाडूंना मिळणार आहे.
ही स्पर्धा केवळ अनुभवी दिग्गजांसाठीच नव्हे, तर देशातील उदयोन्मुख आणि नव्या दमाच्या स्नूकर खेळाडूंना स्वतःचे कसब सिद्ध करण्यासाठी एक मोठे आणि हक्काचे व्यासपीठ ठरणार आहे. येत्या २८ मे पासून सुरू होणाऱ्या या स्नूकर महासंग्रामात क्रीडा रसिकांना उत्कृष्ट क्रीडा कौशल्याचा नजराणा पाहायला मिळणार आहे.
भारतातील अव्वल खेळाडूंची मांदियाळी
यंदाच्या स्पर्धेत भारताचे प्रतिनिधित्व करणारे आणि आंतरराष्ट्रीय स्तरावर चमकलेले दिग्गज खेळाडू आपले नशीब आजमावणार आहेत. यामध्ये प्रामुख्याने कमल, लक्ष्मण रावत, ध्वज हरिया, देवेंद्र जोशी, श्रीकृष्ण, शिवम आणि दिग्विजय काडियान यांसारख्या स्टार खेळाडूंच्या नावांचा समावेश आहे. आपल्या सातत्यपूर्ण आणि उत्कृष्ट कामगिरीसाठी ओळखल्या जाणाऱ्या या खेळाडूंच्या सहभागामुळे या स्पर्धेची उंची आणि प्रतिष्ठा कमालीची वाढली आहे.
