विराट कोहलीचे ऐतिहासिक शतक
रायपूर : ‘किंग’ विराट कोहलीच्या विक्रमी शतकी खेळीच्या जोरावर रॉयल चॅलेंजर्स बंगळुरूने आयपीएल २०२६ मधील ५७ व्या सामन्यात कोलकाता नाईट रायडर्सचा ६ गडी राखून पराभव केला. रायपूरच्या शहीद वीर नारायण सिंह स्टेडियमवर झालेल्या या अटीतटीच्या सामन्यात कोहलीने ५९ चेंडूत शतक ठोकून आयपीएल इतिहासात सर्वाधिक शतकांचा विक्रम मोडीत काढला. या विजयामुळे आरसीबीने प्ले-ऑफच्या शर्यतीत आपले स्थान अधिक भक्कम केले आहे.
कोलकात्याने विजयासाठी दिलेल्या १९३ धावांच्या आव्हानाचा पाठलाग करताना आरसीबीची सुरुवात मध्यम झाली. सलामीवीर जेकब बेथेल १५ धावा करून बाद झाला. मात्र, त्यानंतर मैदानात उतरलेल्या विराट कोहलीने कोलकात्याच्या गोलंदाजांची पिसे काढली. कोहलीने ६० चेंडूंत ११ चौकार आणि ३ षटकारांच्या मदतीने नाबाद १०५ धावांची खेळी केली. त्याला देवदत्त पडिक्कलने ३९ धावांचे मोलाचे योगदान देऊन ६८ धावांची महत्त्वपूर्ण भागीदारी केली. मधल्या फळीत रजत पाटीदार (११) आणि टिम डेव्हिड (२) स्वस्तात बाद झाले, मात्र जितेश शर्माने नाबाद ८ धावा करून विराटाच्या साथीने १९.१ षटकांत विजय साकारला.
तत्पूर्वी, नाणेफेक हरल्यानंतर प्रथम फलंदाजीसाठी उतरलेल्या कोलकाता नाईट रायडर्सने २० षटकांत ४ बाद १९२ धावांचा डोंगर उभा केला होता. सलामीवीर अंगक्रिश रघुवंशीने ७१ धावांची (४६ चेंडू) धडाकेबाज खेळी करत केकेआरला मोठी धावसंख्या उभारून दिली. रिंकू सिंगने अखेरच्या षटकांत फटकेबाजी करत २९ चेंडूंत नाबाद ४९ धावा केल्या. कर्णधार अजिंक्य रहाणे (१९) आणि फिन्न ॲलन (१८) यांना मोठी खेळी करण्यात अपयश आले, तर कॅमेरून ग्रीनने ३२ धावांचे योगदान दिले.
आरसीबीकडून भुवनेश्वर कुमारने ४ षटकांत ३४ धावा देऊन १ बळी घेतला. रसिक सलाम दार, जोश हेझलवूड यांनीही प्रत्येकी एक विकेट घेत कोलकात्याला रोखण्याचा प्रयत्न केला. मात्र, फलंदाजीत केवळ विराट कोहलीच्या 'विराट' खेळीने सामन्याचे पारडे पूर्णपणे आरसीबीच्या बाजूने झुकवले.
संक्षिप्त धावफलक:
कोलकाता: १९२/४ (२० षटके) - (रघुवंशी ७१, रिंकू ४९*, भुवनेश्वर ३४/१)
बंगळुरू: १९४/४ (१९.१ षटके) - (कोहली १०५*, पडिक्कल ३९, कार्तिक त्यागी ३२/३)
आयपीएलमध्ये सर्वाधिक शतके ठोकणारे फलंदाज
विराट कोहली: ९
जोस बटलर: ७
ख्रिस गेल: ६
केएल राहुल: ६
संजू सॅमसन: ५
