खेळाडूंसह समालोचकांवर होणार कायदेशीर कारवाई
मुंबई: भारतीय क्रिकेट नियामक मंडळाने इंडियन प्रीमियर लीग दरम्यान सोशल मीडिया कंटेंट आणि सुरक्षिततेबाबत अत्यंत कडक पावले उचलली आहेत. यापुढे खेळाडू, त्यांचे कुटुंबीय आणि समालोचक मैदानावर किंवा प्रतिबंधित क्षेत्रात रील बनवू शकणार नाहीत. नियमांचे उल्लंघन करणाऱ्यांवर मोठा दंड आणि कायदेशीर कारवाई करण्याचा इशारा बीसीसीआयने दिला आहे.
बीसीसीआयच्या अँटी-करप्शन युनिटने या हंगामात नियमभंगाच्या अनेक घटना टिपल्या आहेत. बोर्डाच्या मते, सोशल मीडियावरील ‘रील संस्कृती’मुळे खेळाडूंची गोपनीयता आणि संघाची सुरक्षा धोक्यात येत आहे. काही वेळा व्हिडिओंमुळे सामन्यापूर्वीच प्लेइंग-११ चे संकेत मिळतात, जे भ्रष्टाचाराला खतपाणी घालू शकते.
ब्रॉडकास्टरसाठी काम करणारे माजी खेळाडू डगआउटमध्ये किंवा मैदानावर स्वतःच्या यूट्यूब चॅनेलसाठी शूट करू शकणार नाहीत. आयपीएलचा अधिकृत गणवेश घालून वैयक्तिक कंटेंट बनवणाऱ्या एका माजी आंतरराष्ट्रीय क्रिकेटपटूला बोर्डाने कायदेशीर नोटीस पाठवण्याची तयारी केली आहे.
खेळाडूंना प्रवासाची माहिती किंवा हॉटेलमधील खासगी व्हिडिओ शेअर करण्यापासून रोखण्यात आले आहे. एका भारतीय वेगवान गोलंदाजाला त्याच्या पत्नीने बनवलेला टीम हॉटेलचा व्हिडिओ प्रमोट केल्याबद्दल यापूर्वीच ताकीद देण्यात आली आहे. फ्रँचायझींनी प्रसिद्धीसाठी नियुक्त केलेल्या सोशल मीडिया इन्फ्लुएन्सर्सवरही बोर्डाने नाराजी व्यक्त केली आहे. त्यांना संघासोबत ‘अनफिल्टर्ड ॲक्सेस’ देण्यावर बंदी घालण्यात आली आहे.
अँटी-करप्शन युनिटने निरीक्षण केले आहे की, काही वरिष्ठ खेळाडू त्यांच्या मित्र किंवा नातेवाईकांना टीम बसमध्ये प्रवास करू देतात. बीसीसीआयने हे स्पष्ट केले आहे की, टीम बस आणि हॉटेलच्या राखीव क्षेत्रांमध्ये केवळ अधिकृत व्यक्तींनाच प्रवेश असेल.
राज्यांमधील लीगवरही परिणाम
हे नियम केवळ आयपीएलपुरते मर्यादित नसून राज्यांच्या टी-२० लीगमध्येही लागू केले जातील. आयपीएलमधील खेळाडू अशा लीगमध्ये खेळताना तरुणांसमोर चुकीचा आदर्श ठेवतात, असे बोर्डाचे मत आहे. मैदानावर आम्ही क्रिकेटच्या गुणवत्तेला प्राधान्य देतो, रील बनवण्याला नाही, असा स्पष्ट संदेश बीसीसीआयने या कारवाईतून दिला आहे.
