उत्तर गोवा प्रधान जिल्हा न्यायाधीशपदी न्या. विजया आंब्रे

पणजी : गोवा न्यायपालिकेत महत्त्वाचे फेरबदल करण्यात आले असून उत्तर गोवा प्रधान जिल्हा न्यायाधीशपदी न्या. विजया आंब्रे यांची नियुक्ती करण्यात आली आहे. त्यांच्यासह राज्यातील आणखी पाच जिल्हा न्यायाधीशांच्या बदल्यांचे आदेश जारी करण्यात आले आहेत. मुंबई उच्च न्यायालयाचे महानिबंधक स्वप्निल खाती यांनी यासंदर्भातील अधिकृत अधिसूचना प्रसिद्ध केली आहे.

अधिसूचनेनुसार, न्या. विजया आंब्रे यांची मेरशी येथील उत्तर गोवा प्रधान जिल्हा न्यायाधीशपदी वर्णी लागली आहे. या पदावर यापूर्वी कार्यरत असलेले न्या. ईर्शाद आगा यांची आता गोवास्थित मुंबई उच्च न्यायालयाच्या निबंधक (न्यायिक) पदी बदली करण्यात आली आहे. या बदलांमुळे उत्तर आणि दक्षिण गोवा जिल्हा न्यायालयांमधील वरिष्ठ स्तरावरील जबाबदाऱ्यांमध्ये फेरबदल झाले आहेत.

न्यायाधीशांच्या नवीन जबाबदाऱ्यांचा तपशील

विशेष म्हणजे, दक्षिण गोव्यातील जबाबदारी सांभाळत असतानाच न्या. शबनम शेख यांच्याकडे मुंबई उच्च न्यायालयाच्या कोल्हापूर खंडपीठात विशेष सेवा अधिकारी (OSD) पदाची अतिरिक्त आणि महत्त्वाची जबाबदारी सोपवण्यात आली आहे. प्रशासकीय कामात सुसूत्रता आणण्यासाठी आणि प्रलंबित प्रकरणांचा निपटारा वेगवान करण्यासाठी या बदल्या करण्यात आल्याचे मानले जात आहे.