बारावीचा निकाल ९२.९६ टक्के; यंदाही मुलींचीच बाजी

पणजी : गोवा शालान्त मंडळाचा बारावीचा निकाल शनिवारी जाहीर झाला असून यंदा राज्याचा निकाल ९२.९६ टक्के लागला आहे. गेल्या वर्षाच्या तुलनेत निकालात २.३३ टक्क्यांची वाढ झाली असून, यंदाही मुलींनीच निकालात बाजी मारली आहे. पर्वरी येथे आयोजित पत्रकार परिषदेत मंडळाचे अध्यक्ष भगीरथ शेट्ये यांनी ही माहिती दिली. यावर्षी एकूण १७,२८३ विद्यार्थ्यांनी परीक्षा दिली होती, ज्यापैकी १६,०६७ विद्यार्थी उत्तीर्ण झाले आहेत. २३ विद्यार्थ्यांचे निकाल तांत्रिक कारणास्तव राखून ठेवण्यात आले आहेत.

यंदा १० फेब्रुवारी ते २७ मार्च दरम्यान २० केंद्रांवर ही परीक्षा घेण्यात आली होती. एकूण उत्तीर्ण झालेल्या विद्यार्थ्यांमध्ये मुलींचे प्रमाण ९३.९३ टक्के (८,५२९ मुली) असून मुलांचे प्रमाण ९१.८९ टक्के (७,५३८ मुले) इतके आहे. शाखानिहाय विचार करता, विज्ञान शाखेचा निकाल सर्वाधिक ९३.९० टक्के लागला आहे. वाणिज्य शाखेचा निकाल ९२.९० टक्के, तर कला आणि व्होकेशनल शाखांचे निकाल अनुक्रमे ९२.२१ टक्के व ९२.२७ टक्के लागले आहेत. दिव्यांग विद्यार्थ्यांच्या कामगिरीतही उल्लेखनीय सुधारणा दिसून आली असून, ८८८ पैकी ८५० (९५.७२ टक्के) विद्यार्थी यशस्वी झाले आहेत.

तालुकानिहाय निकालाची टक्केवारी

गुणांच्या विभागणीनुसार, २,०३५ विद्यार्थ्यांनी ८१ ते १०० टक्के श्रेणीत स्थान मिळवले आहे, तर सर्वाधिक ८,२८० विद्यार्थी ६० ते ८० टक्के श्रेणीत उत्तीर्ण झाले आहेत. संस्कृत आणि बँकिंग या विषयात १०० टक्के विद्यार्थी उत्तीर्ण झाले, तर अर्थशास्त्र हा विषय यंदा सर्वात कठीण ठरला आहे. यंदा २,६२६ विद्यार्थ्यांनी क्रीडा गुणांचा (Sports Marks) लाभ घेतला.

चॅटजीपीटी (ChatGPT) चा वापर आणि कारवाई

यंदाच्या परीक्षेत गैरप्रकाराची एक धक्कादायक घटना समोर आली आहे. दोन विद्यार्थ्यांनी परीक्षा केंद्रात गुपचूप मोबाईल नेला होता. त्यातील एकाने चॅटजीपीटीचा वापर करून उत्तरे मिळवण्याचा प्रयत्न केला, परंतु त्याआधीच भरारी पथकाने त्यांना पकडले. या दोन्ही विद्यार्थ्यांना शून्य गुण देण्याचा कडक निर्णय मंडळाने घेतला आहे.

प्रवर्गनिहाय उत्तीर्ण आकडेवारी

पुढील प्रक्रिया आणि दहावीच्या निकालाबाबत माहिती देताना भगीरथ शेट्ये म्हणाले की, ज्या विद्यार्थ्यांना श्रेणी सुधारायची आहे, त्यांच्यासाठी २७ एप्रिल २०२६ रोजी सुधारित परीक्षा घेतली जाईल. उत्तरपत्रिकेच्या पुनर्मूल्यांकनासाठी २७ मार्चपासून ऑनलाईन पोर्टल सुरू होईल. दहावीचा निकाल १५ एप्रिलनंतर जाहीर होण्याची शक्यता आहे.

गेल्या सात वर्षांची निकालाची तुलना