श्रीलंकेत मृत्यूचा आकडा वाढण्याची शक्यता : तामिळनाडूत ५४ विमानांचे उड्डाण रद्द
चेन्नई : श्रीलंकेत (Sri Lanka) ‘दितवाह’ चक्रीवादळाने (Ditwah Cyclone) हाहाकार माजवला आहे. १२३ जण मृत्यू पावले असून, अनेकजण गंभीर जखमी व बेपत्ता असल्याने मृत्यूचा आकडा वाढण्याची शक्यता वर्तवली जात आहे. १३० लोक बेपत्ता आहेत.
भारतात (India) कर्नाटक (Karnataka), केरळ (Kerala), तामिळनाडू (Tamil Nadu), आंध्र प्रदेश (Andra Pradesh), तेलंगणा (Telangana) या पाच राज्यांत पावसाचा अलर्ट जारी करण्यात आला आहे. तामिळनाडूत ५४ विमान उड्डाणे रद्द करण्यात आली तर शाळा, महाविद्यालयांना सुट्टी जाहीर करण्यात आली आहे. सतर्कतेचे आदेश जारी करण्यात आले आहेत.
श्रीलंकेत चक्रीवादळामुळे जोरदार वारे व मुसळधार पाऊस पडत आहे. त्यामुळे पूरस्थिती निर्माण झाली आहे. सकल भागात पाणी शिरले आहे तर अनेक ठिकाणी दरडी कोसळल्या आहेत. प्रशासनाकडून बचावकार्य सुरू आहे. पर्यटकांना श्रीलंकेला भेट न देण्याचे आवाहन करण्यात आले आहे.
श्रीलंकेत ४३,९९५ लोक निवारागृहात
मुसळधार पावसामुळे श्रीलंकेत आतापर्यंत १२३ लोकांचा मृत्यू झाला आहे तर १३० लोक अजूनही बेपत्ता आहेत. महासंचालक संपत कोटुवेगोडा यांनी या माहितीला दुजोरा देत सांगितले की, आठवडाभर पडलेल्या मुसळधार पावसात घरे उद्ध्वस्त झाल्यानंतर ४३,९९५ लोकांना सरकारी निवारागृहात ठेवण्यात आले आहे.
भारताने पाठवली मदत
भारताने श्रीलंकेला मदत पाठवली आहे. पंतप्रधान नरेंद मोदी यांनी चक्रीवादळात मृत्यू पावलेल्यांना श्रद्धांजली व्यक्त केली आहे. या कठीण परिस्थितीत श्रीलंकेला पूर्ण सहकार्य करण्याची तयारी असल्याचे म्हटले आहे.
तामिळनाडूत ५४ उड्डाणे रद्द, शाळा बंद
चक्रीवादळाचा तामिळनाडूवर परिणाम दिसून आला आहे. विमानतळ अधिकाऱ्यांनी ५४ नियोजित उड्डाणे रद्द केली आहेत. प्रशासनाने शाळा, महाविद्यालयांना सुट्टी जाहीर केली आहे.
चक्रीवादळ उत्तर तामिळनाडू आणि पुडुचेरी किनाऱ्यांकडे सातत्याने पुढे सरकत आहे. प्रशासनाने वादळाचा सामना करण्यासाठी अनेक आघाड्यांवर तयारी केली आहे. भारतात कर्नाटक, केरळ, तामिळनाडू, आंध्र प्रदेश, तेलंगणा या पाच राज्यांत पावसाचा अलर्ट जारी करण्यात आला आहे.
